Кулун тутар 21 күнүгэр Хаҥалас улууһун «Арчы Дьиэтэ» норуот айымньытын дьиэтин, Өрспүүбүлүкэтээҕи Норуот айымньытын киинин тэрийиитинэн Хаҥалас улууһун Өктөм нэһилиэгэр «Күрүө Дьөһөгөйгө сүгүрүйүү» өрөспүүбүлүкэтээҕи тэрээһиҥҥэ Уус-Алдан улууһун делегацията кыттыыны ыллыбыт. Марк Прокопьевич Лиханов сылгытын базатыгар Күрүө Дьөһөгөйгө аналлаах сиэр-туом ыытылынна, оһуохайдаан тэйдибит. Тэрээһин чэрчитинэн төрүт аһы пропагандалааччы, АГАТУ астааһын технологиятын уонна аһылык индустриятын кафедратын профессора Константин Максимович Степанов убаһа этин халахытан буһарыыны көрдөрдө, М. П. Лиханов оҥорбут уохтаах биэ кымыһын амсайдыбыт. Бу тэрээһини НВК «Саха» «Күн дэлэйэ» биэриигэ уһуллулар. Өктөмнөөҕү культуура дьиэтигэр кэлэн Хаҥалас улууһун кылынан сиэлинэн өрөөччүлэр көрүү күрэхтэрэ буолла. Дьүүллүүр субэҕэ биһигиттэн СР норуотун маастара, Россия айар художниктарын сойууһун чилиэнэ Мария Егоровна Петрова үлэлээтэ. Мэҥэ Хаҥалас улууһун Төҥүлү бөһүөлэгиттэн Е. В. Михайлова Ат сувенирдарын коллекциятын, А. С. Баишева кылтан сиэлтэн үлэлэрин, Н. Н. Оконешникова сылгыһыт хаттык таҥастарын сэргии көрдүбүт. Төгүрүк остуолга санаа атастаһыытыгар Мария Егоровна Петрова, Мария Семеновна Атласова, Ольга Прокопьевна Томская, Валентина Николаевна Шадрина, Ньургуйаана Владимировна Никитина, Матрена Николаевна Герасимова кыттыыны ыллылар. Бу тэрээһинтэн элбэҕи билэн, эһиил Күрүө Дьөһөгөйгө сүгүрүйүү сиэрин туомун бэйэбитигэр ыытарга баҕа санаалаах кэллибит.
