Муус устар 13 күнүгэр Кэптэни бөһүөлэгэр «Аартыктарынан айан» бырайыак кыттыылаахтара бэйэлэрин сатабылларын дьоҥҥо-сэргэҕэ тиэрдээри, маастар-кылаас биэрээри кэллилэр.
П. П. Оготоев аатынан Кэптэнитээҕи сынньалаҥ киин үлэһиттэрэ бырайыак кыттыылаахтарын арыылаах алаадьынан айах туттулар, арчылаан көрүстүлэр. Хомус оҥоруутугар Саха Өрөспүүбүлүкэтин норуотун маастара — Куличкин Петр Дмитриевич-Быйаман Уус, таҥас выкройкатын оҥорууга, мээрэй ылыытыгар — Саха Өрөспүүбүлүкэтин норуотун маастара Дегтярева Татьяна Гаврильевна Кэптэни бөһүөлэгин төрүт дьарыгын сэҥээрээччилэригэр маастар кылаас ыыттылар, билиилэрин-көрүүлэрин үллэһиннилэр.
СӨ үөрэҕириитин уонна ыччакка политикатын туйгуна, оҕону олоҥхоҕо уһуйааччы Зинаида Петровна Лугинова салайыытынан улуустааҕы «Олоҥхоҕо айан» 3 сыллаах бырайыак үлэтин түмүктүүр, улуус олоҥхоҕо үлэлэһэр уһуйааннар, оскуолалар үлэлэрин сырдатар сыаллаах анал программанан үлэлэрэ саҕаланна. Ол курдук, Уһун-Күөллээҕи уһуйаан иитээччитэ Сахаяна Ивановна Иванова, Лөгөй орто оскуолатын ветеран учуутала Зинаида Петровна Лугинова, Кэптэнитээҕи «Чэчир» оҕо уһуйаанын иитээччитэ Матрена Ильинична Сысолятина олоҥхоҕо үлэлэрин көрдөрдүлэр, оҕолор олоҥхолоон иһитиннэрдилэр.
«Аартыктарынан айан» бырайыак улуустааҕы Олоҥхо Ассоциациятын, культура, үөрэх управлениятын өйөөһүнүнэн 2017 сылтан салҕанан бара турар. Бүгүн бу бырайыагы салайан илдьэ сырыттылар оскуола иннинээҕи үөрэхтээһин отделын специалиһа Саина Николаевна Слепцова, «Олоҥхо дьиэтэ» этно-культурнай киин специалистара Антонина Анатольевна Артамонова, Матрена Николаевна Герасимова.
