МБУ "Усть-Алданское управление культуры" ❇️ Муус устар 7 күнүгэр Өрөспүүбүлүкэтээҕи норуот айымньытын дьиэтин экспертнэй хамыыһыйата Суотту нэһилиэгэр В.Н.Свинобоев аатын сүгэр норуот тыйаатырын үлэтин билистэ.
Суотту тыйаатырын режиссера Наталья Степанова хамыыһыйа иннигэр тыйаатыр үлэтин билиһиннэрдэ.
Салгыы народнай тыйаатырга сылдьар оҕолор кыра бөлөхтөрө Сергей Васильев-Борогонскай «Мөҥүрүүр Бөҕө» олоҥхотуттан быһа тардыыны толорон иһитиннэрдилэр, улахан бөлөх оҕолоругар уус уран салайааччы Елизавета Портнягина дьарык хайдах ыытылларын көрдөрдө. Тыйаатыр артыыстара хамыыһыйа иннигэр Өксөкүлээх Өлөксөй «Саха дьахталларын мэтириэтэ» айымньытынан инсценировканы уонна 8 хартыыналаах, 2 оонньуулаах Дмитрий Наумов «Гибернация» испиэктээгин оонньоон көрдөрдүлэр. Хамыыһыйа «Саха дьахталларын мэтириэтэ» айымньынан турбут инсценировканы биһирээтилэр, иккис айымньы ситэ арыллыбатаҕынан, артыыстар оруолларын ситэри арыйбатахтарынан өссө үчүгэйдик бэлэмнэнэллэригэр бириэмэ биэрдилэр.
Улуус культуратын пресс-сулууспата.
