«Ыллыыр-туойар Уус Алдан»

Олунньу 2 күнүгэр Николай Тарскай аатынан спорт улуу уораҕайыгар, үтүө үгэскэ кубулуйбут ааспыт сыл түмүктэрин таһаарар, үлэ бастыҥнарын ааттыыр дьоро күҥҥэ, улууспут талба талааннаахтара ылбаҕай ырыаларын, имигэс хамсаныылаах үҥкүүлэрин, уус-уран самодеятельность бастыҥтан бастыҥ нүөмэрдэрин улууспут киинин олохтоохторугар, ыалдьыттарыгар көрдөрдүлэр.

Күнүс 11 чаастан 4 чааска дылы буолбут кэнсиэргэ, улууспут нэһилиэктэриттэн барыта 174 кыттааччы талба талааннарын, кэлбит дьон кэрэхсии көрдүлэр. Тандаттан “Дьиэрэй” эр дьон народнай, Тумултан “Туйма” эр дьон, Кэптэниттэн “Талба”, Тулунаттан “Дьүрүскэн”, Сыырдаахтан “Иэйии”, Чэриктэйтэн “Ай санаа” дьахталлар, Найахыттан “Айхаллан”, Тандаттан “Сыдьаай” ырыа, Өлтөхтөн “Эр модун” үҥкүү ансамбыллара, Дүпсүнтэн “Ситим” хомусчуттар бөлөх, Чэриктэйтэн эдэр толорооччу Дарина Федорова хомуска дьүһүйүүлэрин, Суоттуттан, Өнөртөн, Баатаҕайтан, Арыылаахтан, Майаҕастан, Уһун-Күөлтэн квинтет, квартет, трио толоруулара, Суотту, Курбуһах нэһилиэктэрин эдэр ыччатын эҕэрдэ, китайскай үҥкүүлэрэ, Тиит-Арыы бөһүөлэгин “Ийэкээн” эдэр ийэлэрин түмсүүтүн ырыаларын, үҥкүүлэрин, Хомустаахтан эдэр ыал Кристина, Андрей Ивановтар, Найахыттан Нарыйа Миронова, Айталы Новоприезжая үҥкүүлэрин, Чараҥтан Туйаара Румянцева, Петр Копырин, Екатерина, Гаврил Свинобоевтар, Майаҕастан Константин Иванов, Дмитрий Андросов, Суоттуттан Елизавета Портнягина, Алена Прудецкая, Түүлээхтэн Сергей Винокуров, Петр Константинов, Курбуһахтан Никифор Протопопов, Виталий Курилкин, Өспөхтөн Кирилл Иванов, Николай Румянцев дуэттарын, улууспут биллэр ырыаһыттара Константин Иванов, Андрей Никитин, Гаврил Шепелев, Юрий Сторожев, Игнатий Слепцов, Саргылана Готовцева, Иван Карпов, Марсен Протопопов, Андрей Макаров, Мария Винокурова, Илья Гуляев, Виталий Гоголев, Айнура Стручкова, Афанасий Новоприезжай ырыаларын, өр сыл тохтобул кэнниттэн Чэриктэйтэн Георгий Салышев, саҥа талааннар Тулунаттан Лиза Неустроева, Өнөртөн Долгууна Кардашевская, Түүлээхтэн Никамира Горохова, Сыырдаахтан Эрхаан Слепцов, Өспөхтөн Радомира Спиридонова, Дүпсүнтэн “Туой Хайа-2023” республиканскай ырыа конкурсун оҕолорго Гран-при хаһаайына Ваня Старостин ырыаларын, улууска, өрөспүүбүлүкэҕэ биллэр ырыа айааччы, баянист Өнөртөн Василий Федоров байааҥҥа вариацияларын дьон-сэргэ дохсун ытыс тыаһынан көрүстэ. Кэнсиэри Кэптэниттэн Варвара Федорова, Тулунаттан Гаврил Шепелев, Өнөртөн Мария Лукачевская, Уһун-Күөлтэн Иннокентий Борисов сатабыллаахтык салайан ыыттылар.