Улуус уран уустарын «Мындыр» түмсүүтүн сүбэ мунньаҕа ыытылынна

Тохсунньу ый 18 күнүгэр Олоҥхо дьиэтигэр улуус уран уустарын «Мындыр» түмсүүтүн сүбэ мунньаҕа ыытылынна.

Мунньахха 10 нэһилиэктэн 32 маастар кыттыыны ылла. Сүбэ мунньахха ааспыт сыл тумуктэрин, саҥа үүммүт сылга үлэ былаанын тула кэпсэтиилэр ыытылыннылар, соруктар турдулар.

Мунньаҕы “Мындыр” түмсүү салайааччыта, культура управлениетын начальнига Иннокентий Иннокентьевич Аммосов салайан ыытта.
Олоҥхо дьиэтин салайааччыта Айаал Гаврильевич Аргунов Олоҥхо дьиэтин үлэтин — хамнаһын туһунан билиһиннэрдэ, дьиэ ис тутулун оҥорууга үлэни ыытарга кыттыһарга, санааларын этэллэригэр ыҥырда.

Улуус общественноһын координационнай сэбиэтин бэрэссэдээтэлэ, культура управлениятын начальнигын солбуйааччы Лена Семеновна Павлова улууска общественнай түмсүүлэр үлэлэрин, НКО нөҥүө араас таһымнаах граннарга кыттыахха сөбүн билиһиннэрдэ. Манна улуус иһигэр араас өрүттээх көмө, өйөбүл баарын билиһиннэрдэ.

СӨ норуотун маастара, норуот эмчитэ Варвара Тихоновна Васильева айар үлэҕэ саҥа сүүрээннэри киллэриигэ этиилэрин туһаайда.

Урбаанньыт, тимир ууһа Тимофей Анатольевич Крылов 1 Хоро нэһилиэгэр саҥа аһыллар «АйТал» Уус дьиэтин үлэтин хайысхатын билиһиннэрдэ.

Олоҥхо дьиэтин норуот айымньытын специалиһа Матрена Николаевна Герасимова буолаары турар улахан тэрээһиннэри билиһиннэрдэ. Олортон биирдэстэрэ СӨ норуотун маастара Екатерина Ивановна Колодезникова кэриэһигэр, 75 сылыгар аналлаах “Саха туоһун тойуга” республиканскай туосчуттар фестивалларын тэрийэн ыытыыга “Мындыр” түмсүү күүс-көмө буолалларыгар ыҥырда.

Түмсүү салайааччылара Попов Илларион Егорович, Петрова Мария Егоровна, Гоголева Харитина Ивановна, Охлопкова Галина Семеновна, Васильева Парасковья Николаевна, Колодезникова Ольга Петровна, Егоров Владимир Прокопьевич, Соловьева Пелагея Васильевна бэйэлэрин үлэлэрин, инники соруктарын билиһиннэрдилэр.

Атласова Мария Семеновна, Куличкин Петр Дмитриевич, Пестряков Николай Гаврильевич, Дегтярева Татьяна Гаврильевна, Томская Ольга Прокопьевна түмсүү инники сайдыытыгар бэйэлэрин санааларын эттилэр.

“Мындыр” түмсүү чилиэттэрэ улууспут дьаһалтата ыытар үлэтигэр, өйөбүллэригэр махталларын тиэртилэр.

Саха төрүт үгэһэ, дьарыга сайдыытыгар өссө айымньылаахтык үлэлииргэ сорук туруоруннулар.