Тумул “Айыллан” норуот тыйаатыра

🎭 Сэтинньи 17 күнүгэр Тумул “Айыллан” норуот тыйаатыра Мүрү нэһилиэгин олохтоохторун, ыалдьытттарын иннигэр бэйэлэрин үлэлэрин-хамнастарын билиһиннэрдилэр.

Күнүс 13.00 чаастан

“Дуораан” араадьыйаҕа быһа биэриигэ

норуот тыйаатырын режиссера Андрей Макаров,

тыйаатыр артыыстара, сыана бэтэрээннэрэ Акулина Сокольникова, Петр Черкашин тыйаатыр төрүттэммит историятын, тыйаатырга олохторун анаабыт артыыстар туһунан кэпсээтилэр.

Күнүс 14.00 чаастан

В.В. Никифоров-Күлүмнүүр аатынан “Тойон Мүрү” култуура дыбарыаһыгар “Айыллан” норуот тыйаатырын историятын кэрэһэлиир быыстапка дьон болҕомтотун тарта. Тумулу улуус олохтоохторо “Биһиги Голливудпут” диибит. Тумул дьоно-сэргэтэ уус-уран киинэлэргэ уһуллан чахчы да бу ааты чиэстээхтик сүгэллэр. Быыстапкаҕа уһуллубут киинэлэрин кэлбит дьон эмиэ кэрэхсии көрдө.

19.00 чаастан

норуот тыйаатырын артыыстара  Ф.Бурляков  “Ньургуһун иккистээн тылыннар” уонна  Н.Гоголь “Кэргэн кэпсэтии” кэмиэдьийэлэрин көрдөрдүлэр.

Сцена бэтэрээннэрэ Акулина Сокольникова, Петр Черкашин, Анна Алексеева, Анна Парникова, Анастасия Сухонина, орто көлүөнэ артыыстар Альберт Васильев, Татьяна Габышева, Андрей Макаров онтон да атын артыыстар оонньууларын көрөөччү кэрэхсии көрдө.

Бу күн тыйаатыр 3 көлүөнэ артыыстара сыанаҕа тахсан оонньообуттара көлүөнэ быстыбат ситимин, талаан көлүөнэттэн көлүөнэҕэ бэриллэн иһэрин арылхайдык дакаастаатылар.

Тыйаатыр оҕо студиятын артыыската Нария Васильева Эрилик Эристиин «Хачыгаар» айымньытыттан быһа тардан аахпытын көрөөччү ытыс тыаһынан көрүстэ👍👏👏👏

Тумул норуот тыйаатырын туруорууларынан Арыылаахтан, Майаҕастан анаан-минээн кэлэн көрөн бардылар👏👏👏

“Айыллан”  норуот тыйаатырын артыыстарыгар көрөөччү уҕараабат ытыс тыаһын бэлэхтээтэ!

Биир идэлээхтэрбитигэр, уус-уран самодеятельность актыыбынай кыттыылаахтарыгар салгыы да бу курдук айа-тута, көрөөччүнү үөрдэ туралларыгар баҕарабыт!!!