МБУ "Усть-Алданское управление культуры" СССР уонна Саха АССР 100 сылынан Москва куоракка Саха Республикатыттан улахан делегация кэлэн, Саха сирин норуоттарын культуратын көрдөрөр быыстапкалары туруордулар. Ол курдук, Надежда Бабкина «Русская песня» московскай театрга «Вышитая карта России» проект сүрэхтэниитигэр, «Экспоцентр» киин выставочнай комплексыгар «Ладья. Зимняя сказка» выставка-ярмарка аһыллыытыгар кыттыыны ыллылар. «Сказ на бивне мамонта» Россия норуоттарын муостан кыһан оҥорооччуларын фестивалын Саха Республикатын «Уус» фондата тэрийэн ыыта сылдьар.
Царицыно этнографическай музейга Саха сирин билиһиннэрэр «Сүктэр кыыс» экспозицията турда. Уус-Алдан улууһуттан «Мүрү оһуора » түмсүү (сал. Бочкарева Е.М.) «Кыыс Хаппахчыта» панно, «Арчы» түмсүү (сал. Васильева В.Т.) туостан маллаах иһиттэрэ, Екатерина Колодезникова, Владимир Егоров тирииттэн кымыс иһиттэрэ, Мария Атласова, Мария Федорова паннолара, Иван Окоемов, Александра Босикова этэрбэстэрэ, Пелагея Максимова куобах кулгааҕыттан тикпит оҕо саҕынньаҕа выставкаҕа турдулар. Бу выставка кулун тутар ыйга дылы турар. Царицыно музей заповедник улахан дыбарыаһыгар 17-с ,18-с, 19-с үйэлэргэ кэтэ сылдьыбыт таҥастарын сөргүтэн Сүктэр кыыһы таҥыннарыы сиэрин-туомун көрдөрдүлэр. Саха сирин делегациятын Царицыно музей заповедник үлэһиттэрэ, атын регион делегациялара, көрөөччүлэр олуһун биһирээтилэр. Саха сирин Автономията, СССР төрүттэммитэрэ 100 сыллаах историческай тэрээһиҥҥэ биһиги улуустан элбэх маастар үлэтэ кыттыыны ылбытынан киэн туттабыт.
