Кэрэ эйгэ түһүлгэтэ

2023 сыл Россияҕа Учуутал уонна Үрдүк сүбэһит, Өрөспүүбүлүкэбитигэр үлэ сылларын көрсө, олунньу ый 3, 4 ,5 күннэригэр Дьокуускай куоратка «Арт Севера — зима талантов 2023» 3-с төгүлүн Всероссийскай искусство уонна творчество фестивала үрдүк таһымҥа ыытылынна.
Өрөспүүлүбүлүкэ араас улуустарыттан тыһыынчанан дэгиттэр талааннаах оҕолор ону таһынан улахан дьон, фестиваль ыытар 7 араас хайысхалаах көрүҥнэригэр кэтэхтэн уонна тута кыттыыны ыллылар.
Бу улахан фестивальга 3 күн устата 9 анал экспертнай дьүүллүүр сүбэ тиһигин быспакка үлэлээтэ.
Төһө даҕаны олохпут ыарахан, уустук диэбэккэ хас биирдии учууталлар,
салайааччылар, төрөппүттэр уонна тэрийээччилэр күүскэ ылсан үлэлэспиттэрэ, оҕолору бэлэмнээбиттэрэ тута биллэр, ол курдук ыллыыр, үҥкүүлүүр таһымнара үрдээбитэ, сценическай көстүүмнэрэ кэрэтэ хас биирдии көрөөччүнү сөхтөрдө.
Биһиги нэһилиэкпититтэн театр — мода көрүҥэр «Кыһыл Кырдал» мода бөлөҕө аныгы ыччат кэтэр көстүүмнэрин билиһиннэрдэ, салайааччы Роза Петровна Бубякина.
Суотту орто оскуолатын 8 кылааһын үөрэнээччилэрэ Василина Заровняева,
Василиса Черкашина, Арсен Бубякин, Кеша Черкашин көстүүмнэри кэтэн,
чаҕылхайдык көрдөрдүлэр.
Лауреат 3 степеннээх үрдүк аатын ыллылар уонна кубогынан бэлиэтэннилэр, Үөрүү өрөгөйүн биллилэр.
Бу көстүүмнэри өбүгэ быстыбат ситиминэн кыбытыы тигии уустук ньыматын киллэрэн, тупсаран оҥоһулунна. Айылҕаттан талааннаах, иистэнэрин сөбүлүүр, билигин оҕотугар олорор Роза Петровна Бубякина, сүрэх сылаас иэйиитинэн, илии имигэс иминэн хас биирдии киэргэлин барытын тигэн ситэрбитэ,оҥорбута киһини эрэ үөрдэр. Роза Петровна Намнааҕы пед. колледжын ситиһиилээхтик бүтэрбитэ, үгүс элбэх күрэхтэр кыайыылааҕа, анал маастар кылаастары ыытар, «Түһүлгэ» СК киинин иһинэн «Көмүс утахтар» түмсүүнү салайар.
Үөрүүлээх түгэн Марфа, Сергей Расторгуевтар аатынан государсвеннай циркатын улахан аренатыгар ырыа-тойук оҕо-аймах бырааһынньыга үөрүү аргыстаах дохсун ытыс тыаһынан арыалланан ыытылынна.
Бу киэһээ бастыҥ салайааччыларга истиҥ эҕэрдэлэри ,кыайыылаахтарга анал ааттары, бэлэхтэри туттарыы буолла.
Оҕолорго умнуллубат кэрэ киэһэни, ырыа аргыстаах Лэгэнтэй ситэрэн сүргэни көтөхтө.
Баҕарабыт инникитин кэрэ эйгэ ыллыгын тэлсэн, үтүө үгэһи үксэтэн, араас, дьэрэкээн көстүүлэри,
иэйии абылаҥын арыйан, бар дьону үөрдэ туруохтуннар!

Валентина Бубякина.
Хоноҕор 2023с.