“Кэнчээри сулустаах суолунан”

Кэрэҕэ, сырдыкка угуйар, кэскили, кэрэни кэҥэтэр Арассыыйа үтүөлээх коллектива Кэнчээри 50 сыллаах өрөгөйдөөх үбүлүөйдээх түмүк тэрээһинэ кулун 4 тутар күнүгэр Суорун Омоллоон аатынан опера уонна балет тыйаатырыгар үгүс киһини түмтэ.
Тэрээһин “Кэнчээри сулустаах суолунан” киэҥ куйаары кытта ситимнээх хаартысканан быыстапканан аһылынна уонна кэлбит дьон болҕомтотун тарта.
Быыстапканы Кэнчээри вокальнай-инструментальнай ансамбль (сал. Иннокентий Готовцев, Иннокентий Сивцев) улахан уонна орто бөлөҕүн кыттааччылара бэйэлэрин ырыаларынан астылар.
Быыстапканы үбүлүөйдээх тэрээһиннэр биир сүрүн тэрийээччитэ – “АЙАР КУТ” айар түмсүү салайааччыта Егор Валерьевич Иванов кэлбит дьоҥҥо сиһилии билиһиннэрдэ.
Эҕэрдэлэрин тиэртилэр Уус Алдан улууһун баһылыгын социальнай боппуруостарга солбуйааччы М.В. Борисов, Уус Алдан улууһун культураҕа управлениетын начальнига И.И. Аммосов, Уус Алдан улууһун үөрэх управлениетын начальнига Г.Г. Тимофеев, Мүрү, Найахы нэһилиэктэрин баһылыктара В.И. Аммосов, П.А. Слепцов. Бу үтүө түгэҥҥэ өр сылларга ансамбль сайдыытыгар кылааттарын киллэрбит бастыҥ үлэһиттэр, выпускниктар улуус дьаһалтатын, культура, үөрэх управлениеларын Анал бэлиэлэринэн, Грамоталарынан, Махтал суруктарынан наҕараадаланнылар.
Тэрээһиҥҥэ Кэнчээри ансамбыл выпускницалара Мария Местникова-Максимова, Вероника Пухова-Михеева, Айталина Пантилова уонна ансамбль выпускницалара Ирина Басыгысова, Альбина Турантаева-Шубина үөрэтэр оҕолоро ылбаҕай ырыаларынан эҕэрдэлэрин тиэртилэр.
Кэнчээрилэр кэрэ куоластара, умсулҕаннаах ырыалара, күөрэгэй дьырылааһынынан, кыталык кылыһаҕынан, хатыҥ чараҥ суугунунан, этигэн хомус дьүрүскэнинэн саха норуотун дууһатын, кутун-сүрүн — киэҥ нэлэмэн дойдубут араас улахан сценаларыгар, үгүс омук дьонугар өссө да уһун сылларга тиэрдэ туралларыгар баҕарыаҕыҥ!
Кэнчээрилэр ыраас, кэрэ куоласкыт Сир Ийэ үрдүнэн күөрэгэйдии дьырылаатын, чуораанныы чугдаардын!

Кэрэҕэ кынаттыы тур, Кэнчээри!!!