МБУ "Усть-Алданское управление культуры" 2014 сыллаахха культура управлениетын тэрийиитинэн (нач. Аммосов И.И.) улуус культуратын бэтэрээннэрэ ытык Таатта сиригэр баран күүлэйдээн кэлбиттэрэ. Бу сырыы түмүгүнэн Уус Алдан улууһун культуратын бэтэрээннэрин түмсүүтэ тэриллибитэ. Түмсүү салайааччытынан өр сылларга оройуоннааҕы культура дьиэтин директорынан үлэлээбит СӨ култууратын туйгуна, СӨ «Гражданскай килбиэн» бэлиэ хаһаайката, Мүрү нэһилиэгин бочуоттаах олохтооҕо Мария Алексеевна Копырина талыллыбыта.
Түмсүү бу 10 сыл устата араас хабааннаах үлэни-хамнаһы ыытан кэллэ. Ол курдук, бэтэрээннэр сынньалаҥнарын, араас акциялары, кэнсиэртэри, тэрээһиннэри тэрийии, үөрүүлээх да кутурҕаннаах күннэргэ бииргэ буолан көмөлөрү, өйөбүллэри оҥоруу уо.д.а. Улуус култууратын бэтэрээннэрэ олох оргуйар үөһүгэр буолан нэһилиэктэригэр ыытыллар бары тэрээһиннэргэ көхтөөхтүк кытталлар, нэһилиэк бэтэрээннэрин сэбиэтин салайаллар.
Кулун тутар 19 күнүгэр, Россияҕа бэлиэтэнэр култуура үлэһиттэрин күнүн көрсө, культура управлениетын, культура үлэһиттэрин идэлээх сойууһун кэмитиэтин тэрийиилэринэн Бороҕоҥҥо бэтэрээннэр көрсүһүүлэрэ тэрилиннэ.
Көрсүһүүгэ култуура управлениетын начальнига Сергей Нафанаилов республика бэтэрээннэрин Сэбиэтин бэрэссэдээтэлэ Д.И.Николаев Махтал суругун түмсүүнү 10 сыл салайан кэлбит Мария Копыринаҕа, көрсүһүүгэ кэлбит хас биирдии бэтэрээҥҥэ эҕэрдэ суруктары туттарда. Аҕам саастаах убаастыыр дьоммут саҥа үлэлээн эрэр эдэр салайааччыга бэйэлэрин баҕа санааларын, этиилэрин эттилэр.
Көрсүһүү түмүгэр Уус Алдан улууһун култууратын бэтэрээннэрин түмсүүтүн салайааччытынан култуура управлениетын кылаабынай специалиһа Анна Федорованы биир санаанан таллылар.
