Иван Иванович Бурцевы – Сэргэ Уйбааны, бүгүн муус устар 14 күнүгэр 80 сааһын туолбутунан итиитик-истиҥник эҕэрдэлиибит!!!

Уус Алдан улууһун культураҕа управлениетын, улуустааҕы “Тойон Мүрү” ырыа айааччылар түмсүү ааттарыттан СР үөрэҕириитин туйгунун, СР култууратын туйгунун, “Уус Алдан улууһун култууратын сайдыытыгар киллэрбит кылаатын иһин” анал бэлиэ хаһаайынын, СР норуотун маастарын, алгысчыты, оһуохайдьыты, СР Үтүөлээх, Дархан этээччитин, ырыа айааччыны, улуус, өрөспүүбүлүкэ  ырыа айааччыларын сойуустарын чилиэнин Иван Иванович Бурцевы – Сэргэ Уйбааны, бүгүн муус устар 14 күнүгэр 80 сааһын туолбутунан итиитик-истиҥник эҕэрдэлиибит!!!

Иван Иванович бастакы ырыатын 1970 сыллаахха  Семен Данилов тылларыгар “Чачаани” ырыаны айбыта. Ырыа айааччы быһыытынан айбыт ырыалара Петр Тобуруокап тылларыгар “Дорооболоруҥ Маарыйалар”, Степан Дадаскинов тылларыгар “Мин ырыа кэһиилээх кэлиэҕим” о.д.а. көрөөччүлэр куттарын тутан үгүс сылларга ылланан кэллилэр. Барыта 30-ча ырыалаах. Республика биллэр мелодистарын кэккэтигэр киирбитэ, самодеятельнэй композитор ааты ылбыта. Ырыалара республиканскай таһымнаах биэс ырыанньык кинигэҕэ, ол  иһигэр СӨ ырыа айааччыларын сойууһа таһаарбыт Саха сирин бастыҥ ырыаларын хомуурунньугар киллэриллибиттэрэ, хаһыаттарга бэчээттэммиттэрэ. 1986 с. 4 ырыата Дьокуускайдааҕы радиофондатыгар уһуллубута. 9 ырыата “Эдэр коммунист” уонна оройуон хаһыаттарыгар, ырыа хомуурунньуктарыгар бэчээттэммиттэрэ. 1967 сыллаахха Найахы эр дьонун ансамбылыгар ыллаһан Иркутскай куоракка ыытыллыбыт Бүтүн Союзтааҕы көрүү дипломана буолбута.

Уус быһыытынан кини оҥорон, чочуйан оҥорбут сэргэлэрэ улууспут үгүс нэһилиэктэрин ыһыахтыыр түһүлгэлэрин киэргэтэллэр. Ол курдук сүүрбэттэн тахса араас сэргэлэри оҥорбута.  Ленскэйдээҕи “Доҕордоһуу” түмэлгэ кини оҥорбут сэргэлэрэ аан дойду араас муннуктарыттан кэлбит ыалдьыттары сөхтөрөллөр. 2011 сылга   “СР норуотун  маастара” үрдүк ааты ылбыта.

Иван Иванович оһуохай этээччи буолан 2012 сылтан Оһуохай общество чилиэнэ, 2015 сыл  “Саха сирин үтүөлээх  этээччитэ”, 2018 сылга бу ааты иккиһин бигэргэтэр, үгүс улуустааҕы, илин эҥэр, өрөспүүбүлүкэ оһуохай этээччилэрин күөн-күрэстэрин кыайыылаҕа.

Алгысчыт быһыытынан улууска ыытыллар араас тэрээһиннэри, ыһыахтары алгыстаан, арчылаан арыйбыта.

Ытыктабыллаах Иван Иванович! Өссө да уһун сылларга айымньылаах олоҕу баҕарабыт!!! Сүһүөҕүн үрдүгэр сүүрэ сылдьан сүүс сааскар тиий диэн алгыс тылларбытын аныыбыт! Эйиэхэ, Эн дьиэ кэргэҥҥэр барыта этэҥҥэ буолууну баҕарабыт!!!