Гавриил Гаврильевич Колесов аатынан Мэҥэ-Хаҥалас улууһун Оройуоннааҕы норуот айымньытын киинэ «Олоҥхо Дьиэтэ» “Олоҥхо алгыстаах айана” бырайыагынан Уус Алдан улууһугар ыалдьыттаата.

Сэтинньи ый 18 күнүгэр Гавриил Гаврильевич Колесов аатынан Мэҥэ-Хаҥалас улууһун Оройуоннааҕы норуот айымньытын киинэ «Олоҥхо Дьиэтэ» “Олоҥхо алгыстаах айана” бырайыагынан Уус Алдан улууһугар ыалдьыттаата. Бу өрөспүүбүлүкэ 11 Олоҥхо Дьиэлэрэ биир ситимҥэ үлэлиирбитигэр биир бастакы хардыы буолла.
«Олоҥхо Дьиэтэ» оройуоннааҕы норуот айымньытын киинин директора Евдокия Николаевна Иванова Олоҥхо Дьиэтин үлэтин-хамнаһын билиһиннэрдэ.
Өрөспүүбүлүкэтээҕи “Куйуур олоҥхото”, өрөспүүбүлүкэтээҕи “Олоҥхо батл” телевизионай күрэх көрөөччү биһирэбилэ бириис хаһаайына Станислав Иванов олоҥхолоон, “ноо” дэтэн көрөөччү кутун тутта.

“Олоҥхо оҕо хараҕынан” бырайыак автора, М.К.Попова аатынан Майатааҕы оҕо искусствотын оскуолатын преподователэ, биир дойдулаахпыт Анастасия Михайловна Константинова саха култууратын оҕоҕо олоҥхонон уруһуй нөҥүө тиэрдэри кэпсээтэ.
Саха Өрөспүүбүлүкэтин норуот уус-уран оҥоһуктарын маастара, Саха Өрөспүүбүлүкэтин куукула оҥорооччуларын Сойууһун чилиэнэ Лидия Михайловна Николаева “Ыһыах”, “Байанай алгыһа” куукуланан композицияларын сырдатта.
Дэгэрэн ырыатынан биир дойдулаахпыт, Олоҥхо дьиэтин фольклорга специалиһа Ларьяна Васильева, кыл кылыһахтаах кырыымпа оонньуутунан Дмитрий Ченянов сэргэхситтилэр.
Тэрээһин түмүгүнэн Мэҥэ Хаҥалас улууһун Г.Г.Колесов аатынан оройуоннааҕы норуот айымньытын киинэ “Олоҥхо Дьиэтэ” уонна Уус Алдан улууһун “Олоҥхо Дьиэтэ” этнокультурнай киин саха норуотун тылынан уус-уран баайын Олоҥхону чинчийиигэ, тарҕатыыга, үйэтитиигэ, сөргүтүүгэ биир сүбэнэн үлэлииргэ сыаллаах Сөбүлэһиигэ илии баттастыбыт.