XV-с Олоҥхо ыһыаҕа Ытык Үөһэ-Бүлүү улууһугар Түгэхтэй алааһыгар арылынна!

     Уус Алдан улууһун делегацията 45 киһилээх Олоҥхо ыһыаҕар күөн-көрсө, илин-кэлин түсүһэ, норуот талаанын көрө-истэ, сөҕө-махтайа кэллэ.
     Ол курдук сарсыарда «Күнү көрсүү» сиэригэр-туомугар Үрүҥ күнү айхаллыы көрсөн күүс-уох, үтүө санаа, алгыс ылынныбыт.
     Сарсыарда 7.30 чаастан түһүлгэбитигэр киирэн уран тарбахтаах маастардарбыт быыстапкаларын туруордубут, дьон-сэргэ сэҥээриитин, сөҕүүтүн-махтайыытын ыллыбыт. Лоп курдук 11 чааска Аал Луук Мас иннигэр «Хотун Бүлүү туонатыгар -Олоҥхо Ыһыаҕа» өрөспүүбүлүкэтээҕи Олоҥхо Ыһыаҕын үөрүүлээх аһыллыыта ыытылынна. Манна барыта 1500 киһи кыттыыны ылла, аан дойду шедеврын толорор элбэх норуоттар ытык-мааны ыалдьыттар буоллулар.
     Биһиги делегациябытын Үөдүгэй нэһилиэгэ түһүлгэлэригэр үөрэ-көтө көрүстүлэр, сахалыы амтаннаах астарынан маанылаатылар, эдэр кэскиллээх баһылык Альберт Юрьевич Иванов эҕэрдэ бастыҥын анаата. Бэйэбит ааппытыттан делегация салайааччыта Лена Семеновна Заболоцкая улуус баһылыга Федотов Алексей Васильевич аатыттан эҕэрдэ суругун, өйдөбүнньүк бэлэхпитин туттардыбыт, ыллам ырыаларынан Варвара Аманатова, Михаил Пухов, Ньургуйаана Никитина эҕэрдэлээтилэр.
     Эбиэт кэннэ Олоҥхо Ыһыаҕын араас түһүлгэлэринэн күрэхтэргэ кытынныбыт.
Киэһэ 17.30 чааска Үөһээ Бүлүү улууһугар Олоҥхо Дьиэтин үөрүүлээх арыйыы сиэрэ-туома ыытылынна, Саха Өрөспүүбүлүкэтин Ил Дархана А.С.Николаев «Олоҥхо Дьиэлэрин биир ситимэ» анал ыйааҕын бэлиэтэ өрөспүүбүлүкэҕэ үлэлиир Олоҥхо Дьиэлэригэр туттарда. Ол кэннэ А.С.Борисов туруоруутугар «Хардааччы Бэргэн» испиктээкил туруоруллубута көрдөрүлүннэ, көрөөччү биһирэбилин ылла.
     Саха сирин улуустарыттан 100 киһи кыттыылаах П.А.Ойуунускай «Дьулуруйар Ньургун Боотур » олоҥхотун уһун тыыннаах ааҕыыга Лена Семеновна Заболоцкая кыттыыны ылла.
«Таҥалайдаах көнтөстөөх, түөрт түөрэм туйахтаах Күн Дьөһөгөй Айыы оҕотун симэҕэ-киэргэлэ» ат симэҕин көрүү күрэҕэр Данилова Людмила Ивановна уонна Дегтярева Татьяна Гаврильевна оҥоһуктара кыттыыны ыллылар. Бэлиэтээн эттэххэ бу симэхтэр ыһыах аһыллыытыгар, 100 аттаах дьон киириитигэр туттуллубуттара.

     Василий Тимофеев «Кыл кылыһах алыптаах дорҕооно» кырыымпаһыттар күрэхтэригэр кыттыыны ылан анал аакка тигистэ 3000₽ солк. сертификат

     Оҕолорго олоҥхону толоруу түһүлгэтигэр Кэптэниттэн Марк Олесов, Диана Петухова, Тумултан Айсена Новоприезжая

     Улахан дьоҥҥо олоҥхо толоруутун түһүлгэтигэр Иван Карпов кыттыыны ыллылар.

     Олоҥхо иккис эргиирин тэрийэн ыытар Национальнай комитет Бэрэссэдээтэлэ, СӨ Ил Түмэнин солбуйар бэрэссэдээтэлэ Александр Николаевич Жирков Бочуоттаах грамотатынан тимир ууһа Семен Семенович Петров үөрүүлээх быһыыга майгыга наҕараадаланна

error: МБУ \"Усть-Алданское управление культуры\"