Уус Алдан улууһун баһылыгын балаҕан ыйын 18 күнүнээҕи 2012 сыл 30 №-дээх дьаһалыгар олоҕуран, оройуон депутаттарын сэбиэтин 53 сессиятынан бигэргэнэн «Уус-Алдан улууһун норуотун маастара» аат уран тарбахтаах уустарбытыгар, иистэнньэҥнэрбитигэр 2012 сылтан иҥэриллэр. Күн бүгүн улууска 39 улуус норуотун маастардара олороллор.
Улуус Экспертнэй Сэбиэтин быһаарыытынан 2021 сылга «Уус-Алдан улууһун норуотун маастара» үрдүк ааты ыллылар: Баатаҕай нэһилиэгиттэн Николаева Людмила Михайловна, Байаҕантай нэһилиэгиттэн Андросова Наталья Егоровна уонна Мүрү нэһилиэгиттэн Лугинова Валентина Георгиевна, Федорова Валентина Афанасьевна, Саввина Любовь Николаевна.
Кулун тутар 3 күнүгэр Бороҕоҥҥо, офиснай киин аактабай саалатыгар, Саха Өрөспүүбүлүкэтигэр бэлиэтэнэр Норуот маастарын күнүн көрсө, улуус норуотун маастара ааттары ылбыт, тарбахтарыгар талааннаах Далбар Хотуттары чиэстиир үөрүүлээх тэрээһин ыытылынна. Тэрээһиҥҥэ улуус баһылыгын солбуйааччы, Экспертнэй Сэбиэт бэрэссэдээтэлэ М.В. Борисов эҕэрдэ тыл эттэ уонна үөрүүлээх быһыыга-майгыга маастар буолбуттарын туоһулуур дастабырыанньалары, түөскэ кэтиллэр үрүҥ көмүс бэлиэлэри туттарда. Маастар аатын ылбыт дьоммутугар бэйэлэрин эҕэрдэлэрин төрөөбүт нэһилиэктэрин дьоно-сэргэтэ, аймахтара, доҕотторо эттилэр.
