Уус Алдан улууһугар саха тылын инники сайдыытын торумнуур киэҥ ыҥырыылаах Сүбэ тэрээһинэ 400-чэкэ кэриҥэ кыттааччылары муста.
Бу күн улуус олохтоохторо, биир дойдулаахтар, саха тылын туһугар туруулаһар дьон 4 түһүлгэҕэ мустаннар тыл сайдыытын тыын боппуруостарын тула аһаҕастык кэпсэтэллэр. Бу үөрүүлээх күн Олоҥхо дьиэтигэр Ахсынньы- Билгэ Хаан ыйын арыйар куту-сүрү бөҕөргөтөр, олорор эйгэни ыраастыыр, өйү-санааны сааһылыыр алгыһынан саҕаланна. Ол кэннэ түһүлгэлэр 7 сааһыгар диэри оҕолорго, 8-тан 17 дылы саастаах оҕолорого, 18–тан 35 дылы саастаах ыччат дьоҥҥо, 36–тан үөһээ саастаах дьоҥҥо туһуланан үлэлэрин саҕалаатылар. Тэрээһиннэри улуус Управлениеларын салайааччылара иилээн-саҕалаан ыыттылар, дакылааччыттарынан педагогтар, учууталлар, төрөппүттэр, саха культуратын, тылын, фольклорун сайдыытыгар үлэлэһэр тэрилтэлэр салайааччылара буолаллар.
Эбиэттэн киэһэ Сэһэн Ардьакыап аатынан музейга уонна Кииннэммит библиотекаҕа экскурсиялар тэриллэн ыытыллыахтара. Ол кэннэ Күлүмнүүр аатынан культура дыбарыаһыгар Уус Алдан улууһугар саха тылын инники сайдыытын туһунан киэҥ ыҥырыылаах Сүбэ тэрээһин пленарнай чааһа буолар.
Улуус дьаһалтатын пресс-службата.
