Саха Республикатыгар Норуот маастарын күнэ

Кулун тутар 5 күнэ — Саха Республикатыгар Норуот маастарын күнүнэн бэлиэтэнэр.
Былыр-былыргыттан өбүгэлэрбит мындыр өйдөрүнэн, тарбахтарыгар талааннарынан уус-уран оҥоһуктары оҥорон, көлүөнэттэн-көлүөнэҕэ биэрэн норуот ис туруга, өйө-санаата баай, муударай буолуутугар, ис кыаҕа сайдыытыгар улахан нэһилиэстибэни хаалларбыттара.
          2013 сылтан улууспутугар маастардарбыт үлэлэрин-хамнастарын өйөөн, норуоппут нэһилиэстибэтин хаалларар, сайыннарар сыаллаах 2013 сыллаахха “Мындыр” уран уустар общественнай түмсүүлэрэ тэриллибитэ. Салайааччы культура управлениятын начальнига Аммосов Иннокентий Иннокентьевич. Түмсүүгэ 73 талааннаах маастар улуустарын аатын ааттатан айа-тута сылдьаллар. Кинилэр ортолоругар 15 СР норуотун маастара, 25 СР уус-уран оҥоһуктарын маастара, 44 Уус Алдан улууһун норуотун маастардара бааллар.
Быйыл Өксөкүлээх Өлөксөй аатынан норуоттар доҕордоһууларын дьиэтигэр кулун тутар 2 күнүттэн 6 күнүгэр диэри турар, Россияҕа культурнай нэһилиэстибэ сылыгар уонна Саха АССР 100 сылыгар аналлаах XII республиканскай «Якутия мастеровая» быыстапка-дьаарбаҥкаҕа уонна «Народное искусство-национальное достояние» регионнар икки ардыларынааҕы быыстапкаҕа биһиги улууспутуттан 45 талааннаах дьоммут үлэлэрэ кэлэн турда.
          Кулун тутар 3-4 күннэригэр ыытыллыбыт эр киһи сонун тигии күрэҕэр 3 миэстэни ылары ситистэ Алексеева Зинаида Алексеевна, 2 миэстэни ылла Егорова Алдана Иннокентьевна. Кылтан эр киһи сэлээппэтин өрүүгэ 1 миэстэни ылла Бочкарева Парасковья Владимировна.
          Бүгүн Дьокуускай куоракка Саха сирин норуоттарын төрүт үгэскэ олоҕурбут кыһыҥҥы көстүүмнээх сэлэлии хаамыыга биһиги улууспутуттан 100-тэн тахса дьоно сахалыы кыһыҥҥы сонноох кыттыыны ылыахтара.
Талааннаах, уран тарбахтаах, мындыр өйдөөх ытык-мааны маастардарбытыгар саха омугун үйэлээх сүдү кистэлэҥнэрин, билиилэрин, киэҥ көрүүлэрин, дьоҕурдарын туһанан, дьоҥҥо-сэргэҕэ үтүө холобур буолан үөрэтэ-такайа, сүбэлии-амалыы сылдьын диэн баҕарабыт.