Муус устар 2 күнүгэр С.С. Васильев-Борогонскай аатынан улуустааҕы киин библиотека ааҕар саалатыгар саха уус-уран литературатын төрүттээбит, биллиилээх общественнай уонна политическай деятель, биһиги омук олохпутун, норуоппут тылынан уус-уран айымньытын аан бастакынан чинчийбит, киэҥ философскай көрүүлээх поэт, учуонай Алексей Елисеевич Кулаковскай – Өксөкүлээх Өлөксөй суос-соҕотох уола суруйааччы, учуутал, поэт — Реас Алексеевич Кулаковскай төрөөбүтэ 110, кини төрөппүт уола – Сэбиэскэй Сойуус хайыһарга спордун маастара, талааннаах салайааччы, Атос Реасович Кулаковскай төрөөбүтэ 85 сылларын бэлиэтиир тэрээһин бэрт иһирэхтик, үрдүк таһымнаахтык ыытыллан ааста. Үбүлүөйдээх бэлиэтээһиҥҥэ республикабыт, улууспут салайааччылара, Реас Алексеевич, Атос Реасович чугастык алтыспыт үтүөкэн дьоно, биир дойдулаахтара, биир идэлээхтэрэ, учуонайдар, үөрэнээччилэрэ, аймахтара, дьиэ кэргэттэрэ кыттыыны ыллылар. Тэрээһиҥҥэ библиотека фондатын матырыйаалларынан үбүлүөйдээх дьоммут Реас Алексеевич, Атос Реасович Кулаковскайдар уонна кинилэр сылдьааннарын олохторун, айар үлэлэрин сырдатар “Төрүт киһи төрүөҕэ, ытык киһи ыччаттара” быыстапка, ону тэҥэ куйаар ситиминэн библиотека элекроннай фондатыттан анал хомуурунньуктар дьон көрүүтүгэр, киэҥ эйгэҕэ тарҕаннылар.
Улуустааҕы кииннэммит библиотека тиһигин пресс-сулууспата
