Өлтөх нэһилиэгин Арыылаах бөһүөлэгэр «Эйгэ» сынньалан киин 60 сыллаах үбүлүөйүн бэлиэтээннэ

Өлтөх нэһилиэгин Арыылаах бөһүөлэгэр ахсынньы 3 кунугэр «Эйгэ» сынньалан киин 60 сыллаах үбүлүөйүн бэлиэтээтибит.
Тэрээһин кулуубу ыраастаан сыт таһааран, кэлбит ыалдьыттары арыылаах алаадьынан күндүлээн арчылааһынтан саҕаланна. Олоҥхо дьиэтин үлэһиттэрин тойуктара дуораһыйда, «Эр Модун» үҥкүү бөлөҕө дьөһөгөй үҥкүүнэн ситэрэн үбүлүөйдээх күнү астылар.
Өр сылларга сыралаах үлэлэрин, уус-уран самодеятельностка көхтөөх кыттыыларын иһин уонна общественнай олох лидердарын наҕараадалааһын көрөөччүлэр ытыстарын тыаһынан доҕуһуолланна.
Салгыы буоларын курдук истин ис хоһоонноох сценарий хаамыытынан сцена маастардарын концера буолла. Ынырыллан кэлбит ыалдьыттарбыт баян тыаһа доҕуһуоллаах Анна, Иннокентий Артамоновтар, Прасковья Данилова, гитара тыаһынан Айтал Карамзин, сцена ветерана Иван Румянцев, биир идэлээхтэрбит Сыырдаахтан «Абылан» вокальнай ансамбыл ылбаҕай ырыаларын бэлэхтээтилэр. «Кустук» оҕо үҥкүүтүн выпускницата хореограф идэлээх Диана Федотова- нарын хамсаныылаах үҥкүүлэрэ, «Дэгэйик» (сал. Л. С. Васильева), «Сардана» бальнай үҥкүү (сал. М. С. Алексеева) бөлөхтөрө, нэһилиэк «Эр Модун» үҥкүү бөлөҕө (сал. А.А.Саввина) ыалдьыттаатылар.

Бу курдук салгыы 60 сыллаах үбүлүөйүнэн «Эйгэ» дьону-сэргэни тумэр киин» брошюра иккис чааһа, кулууп иһинэн улэлиир «Дууһам иэйиитэ» айар түмсүү 5 сылынан хоһоон хомуурунньуга таҕыста. Айар талааннаах 6 хоһоон айааччыларга туттарылынна.

Араас сыллар уус-уран самодеятельноһын кыттыылаахтара, общественнай үлэ активистара «Ахтыы киэһэтэ» астаах остуол тула олус истиҥник, мустубут дьон дуоһуйа кэпсэтэн, санаа үллэстэн «Эйгэ» сынньалаҥ киин материальнай базата хаҥыырыгар сэмэй кылааттарын киллэрдилэр.

Махтанабыт үбүлүөйнэй концертпыт сценарийын суруйбут Орто-Эбэ сүрүн оскуолатын учууталларыгар Надежда Афанасьевна Говороваҕа, Александра Васильевна Жирковаҕа, бырааһынньыктааҕы тортпутун онорбут администрация үлэһитигэр Мария Спиридоновна Алексееваҕа, биир дойдулаахпыт ИП Антонина Петровна Богатыреваҕа, тэрээһин үлэтигэр кыттыспыт Арыылаах бөһүөлэгин тэрилтэлэригэр, Бэйдиҥэтээҕи А.П.Петров аатынан норуот айымньытын дьиэтин улэьиттэригэр, Елтех нэьилиэгин дьаһалтатыгар. 
Күндү бар дьоммут бу курдук өрүү көхтөөх, кэрэ эйгэни кэрэхсээн бары доруобайдык, сырдыгы эрэ ыралаан дьоллоохтук олоруоҕуҥ!