Муус устар 17 күнүгэр культура ветераннарын Сэбиэтин саҥа талыллыбыт састааба үлэни, сынньалаҥы тэҥҥэ тутан Суоттуга музейга баран кэллибит. Куруук үөрэ көрсөр музей коллективыгар (директор Новоприезжая Н.Я.), бары тэрээһин үлэлэри кыайа тутан тэрийэр, көрсөр биир идэлээхпитигэр Варвара Петровна Гоголеваҕа түгэнинэн туһанан махталбытын тиэрдэбит.
Саҥа тэриллибит састаап бастакы тэрээһиммитин ыыттыбыт, элбэх идеялар, этиилэр киирдилэр, онтон көрөн, туолар өттүн туһанан, быйылгы уонна кэлэр сылларга туох үлэ-хамнас ыытыллыахтааҕын торумнаатыбыт. Ханнык баҕарар үлэҕэ былааннаах үлэ хаһан баҕарар тахсыылаах буолар, олохпутун бэйэбит интириэһинэйдик тэринэн, кэрэни кэрэхсээн, сырдык санаалаах олох устун хааман, ветераннарбытыгар күүс көмө буолуохпут диэн эрэллээх тарҕастыбыт.
Бу тэрээһини өйөөн массыынанан хааччыйбыт эдэр салайааччыбытыгар С.С.Нафанаиловка, профсоюзпут председателигэр Г.В.Аммосоваҕа инники үлэбитигэр куруук көмө, өйөбүл буолуохтара диэн эрэнэбит, махтанабыт.
