Бүгүн – улууспут киинигэр култуура эйгэтин үлэһиттэрин дьоро күнэ. Ол курдук Култуура сылын үөрүлээхтик арыйыы, ааспыт сыл түмүгүнэн култуура бастыҥнарын чиэстиир үөрүүлээх тэрээһин күнэ. Бу дьоро күн култуура үлэһиттэригэр Уус Алдан улууһа төрүттэммитэ 100 сылын көрсө ыытыллар үлэ былааннарын тула сүбэ мунньаҕынан саҕаланна.
Мунньаҕы улуус баһылыгын сүбэһитэ Иван Колодезников, социальнай эйгэҕэ солбуйааччы Григорий Аргунов, улуус култуураҕа управлениетын начаалынньыга Эльза Киренская иилээн-саҕалаан ыыттылар. Иван Иванович былааннаммыт үлэ тосхолун иһитиннэрдэ, Григорий Федорович ааспыт сылга төрөөбүт тылбытын харыстыырга, сайыннарыыга туһуламмыт киэҥ далааһыннаах сийиэс, улууска кэпсэтии түмүгүнэн ылыныллыбыт кэккэ этиилэри иһитиннэрдэ.
