Өймөкөөн сиригэр-уотугар ыытыллар «Айыы санаа айана» XVI Олоҥхо Ыһыаҕар кыттыыны ыла барар улууспут талба талааннаахтарын, бүгүн бэс ыйын 29 күнүгэр, айан суол аартыгар, Тойон Мүрү сиригэр, атаарыы сиэрэ-туома ыытылынна.
Дьоммут сэргэбит бу ыраах, уһун айаҥҥа этэҥҥэ сылдьан кэлэллэригэр айыыларбытыттан көрдөһөн сирбитин-уоппутун аһаттыбыт.
Делегацияны улуус баһылыгын солбуйааччы Семен Бурнашев, культура управлениетын начальнига Иннокентий Аммосов салайан илдьэ сылдьыахтара.
Олоҥхо ыһыаҕын күөн-күрэстэригэр кыттыыны ылыахтара:
• олоҥхону бөлөҕүнэн толорууга З.П. Лугинова салайар Лөгөй орто оскуолатын “Кулуһун” оҕолор, А.А.Артамонова салайааччылаах улахан дьон бөлөхтөрө;
• Фольклор көрүҥнэригэр оһуохайга, хомуска, тойук, дэгэрэҥ ырыаны толорууга, барыта 20 киһи кыттыыны ылыахтара.
• Уус-уран оҥоһуктар быыстапкаларыгар улууспут тарбахтарыгар талааннаахтара, Саха Өрөспүүбүлүкэтин, улууспут норуотун маастардара – 29 киһи.
• Ох саанан ытыыга улууспут чиэһин көмүскүөхтэрэ Сусанна Аммосова, Татьяна Винокурова, Мария Федорова, Илья Готовцев, Семен Петров, күүстээхтэр күрэхтэригэр Дмитрий Попов.
Олоҥхо ыһыаҕар айаннааччылары улууспут баһылыга Алексей Федотов, баһылык солбуйааччыта Михаил Борисов алгыс тылларын этэн атаардылар.
Ыраах айаҥҥа туруммут улууспут талба талааннаахтарыгар сымнаҕас айаны, кыайыы-хотуу көтөллөөх эргиллэн кэлэллэригэр баҕарыаҕыҥ!!!
