Алтынньы ый 30 күнүгэр “Олонхо дьиэтэ” этно-культурнай кииҥҥэ, култуура эйгэтигэр араас кэмнэргэ үлэлээбит, бочуоттаах сынньалаҥҥа олорор уонна билигин да култуура сайдыытыгар айа-тута, үлэлии-хамсыы, бэйэлэрин сүҥкэн кылааттарын киллэрсэ сылдьар аҕам саастаах убаастыыр биир идэлээхтэрбитигэр аналлаах, быйылгы үлэ сезонугар бастакы улахан тэрээһин ыытылынна.
Бу күн ыҥырыыбытын ылынан, ыраахтан-чугастан күндү дьоммут тоҕуоруһа муһуннулар.
Тэрээһини улуус култууратын үлэһиттэрин идэлээх сойууһа (бэрэссэдээтэл Заровняев Б.И.), улуустааҕы бэтэрээннэр Сэбиэттэрэ (бэрэссэдээтэл Лугинова А.Е.) тэрийэн ыыттылар.
Тэрээһин арыллыытыгар улуус култуураҕа управлениетын начальнига Эльза Михайловна Киренская, улуус култууратын үлэһиттэрин идэлээх сойууһун кэмитиэтин бэрэссэдээтэлин солбуйааччы Марианна Александровна Сергеева бэтэрээннэри эҕэрдэлээн, баҕа санааларын эттилэр, Улуу Кыайыы 80 сылыгар төрөөбүт, үбүлүөйдээх саастарын туолбут биир идэлээхтэрбитигэр эҕэрдэ суруктары, сэмэй бэлэхтэри туттардылар. Бэтэрээн сэбиэтэ “Бастыҥ актыбыыс” бэтэрээннэргэ Анал ааттары, өйдөбүнньүк бэлэхтэри туттардыбыт.
Тэрээһини ыччат уонна орто көлүөнэ саастаах култуура үлэһиттэрэ ылбаҕай ырыаларынан, нарын үҥкүүлэринэн киэргэттилэр.
Толору астаах остуол тула олорон, урукку кэм кэрэ бэлиэ кэмнэрэ ахтылыннылар, истиҥ кэпсэтиилэр таҕыстылар.
“Дело в шляпе” күрэхтэһии түмүгүнэн анал аат хаһаайкаларынан Сыырдаахтан Александра Портнягина, Мындаабаттан Марфа Андреева, Матрена Готовцева, Курбуһахтан Елена Винокурова буоллулар.
Улуустааҕы Киин бибилэтиэкэ үлэһиттэрэ Галина Владимировна Аммосова, Ольга Николаевна Павлова “Комсомол – мин сүрэхпэр” быыстапкалара көрөөччүлэр биһирэбиллэрин ылла.
Ыһыылаах-хаһыылаах, хатыламмат хамсаныылаах, үөрүү-көтүү өрөгөйдөөх араас көхтөөх оонньуулар ыытылыннылар.
Бу тэрээһиҥҥэ кэлбит кырдьаҕастарбыт уонна ыалдьыттарбыт ирэ–хоро кэпсэтэн, сэргэхсийэн уонна дуоһуйан тарҕастылар.
