III норуоттар икки ардыларынааҕы хомуска оонньооччулар күрэхтэрин көрсө Бороҕоҥҥо киин болуоссакка хомуска күргүөмүнэн тардыы флешмоба ыытылынна

Бүгүн, бэс ыйын 2 күнүгэр күнүс 11 чаастан киин болуоссакка Аан дойду норуоттарын хомуска түмэлин уонна киинин көҕүлээһиннэринэн, “Аан дойду виртуоз хомусчута” III норуоттар икки ардыларынааҕы хомуска оонньооччулар күрэхтэрин көрсө Бороҕоҥҥо киин болуоссакка хомуска күргүөмүнэн тардыы флешмоба ыытылынна.

Манна кыттыыны ыллылар улуустааҕы Хомус Ассоциацията (сал.Л.С.Павлова), Бороҕоннооҕу искусство оскуолатын “Хатан хомус” бөлөҕө(сал.Л.С.Слепцова), Үһүс саас оскуолата ( сал. Л.С.Слепцова, Д.Н.Бурнашева), “Күндүүнэ” бөлөх (сал.А.Г.Мигалкина), Мүрү 1№-дээх оскуолатын 3 “в” кылааһын үөрэнээччилэрэ (сал.Е.С.Парникова) уонна учууталлара, улуустааҕы Олоҥхо Дьиэтин коллектива (сал.Е.Н.Данилова), улуустааҕы киин библиотека коллектива (сал.В.Н.Окоемова), Тулунаттан «Оһуор» оҕолор бөлөхтөрө (сал. Л.И. Жиркова), «Дьүрүскэн» бөлөх (сал. Н.И. Куприянова, Л.И.Жиркова), Майаҕастан “Дьөһөгөй” оҕолор бөлөхтөрө (сал.А.Е.Илистярова). Барыта 90 тахса киһи кыттыыны ылла. Хомуһу таһаарааччыларынан буоллулар Дьулустаан Заболоцкай, Егор Ширяев, Прокопий Степанов. Флешмобу улуустааҕы пресс сулууспа видеоҕа уһулла. Сарсын Дүпсүн, Найахы, Бороҕон нэһилиэктэрэ флешмобка кыттыыны ылыахтара. Бу устуулар “Аан дойду виртуоз хомусчута” III норуоттар икки ардыларынааҕы хомуска оонньооччулар күрэхтэрин үөрүүлээх аһыллыытыгар көстүөҕэ.