Саха норуота тапталлаах, биллэр толорооччута, ырыа айааччыта, дэгэрэҥ ырыатын аҕата Христофор Максимов быйыл төрөөбүтэ 105 сыла. Үбүлүөйдээх сылы түмүктүүр тэрээһин Христофор Максимов Фондатын тэрийиитинэн, ахсынньы 14 күнүгэр А.Е.Кулаковскай аатынан норуоттар доҕордоһууларын дьиэтигэр, “Киристэпиэл кэрэхсэлэ” диэн кэнсиэринэн түмүктэннэ. Кэнсиэргэ Амма, Мэҥэ-Хаҥалас, Нам, Үөһэ-Бүлүү, Ньурба, Уус Алдан улуустарыттан, Хатастан, Дьокуускай куораттан дэгэрэҥ ырыаны толорооччулар кытыннылар.
Биһиги улууспутуттан эдэр ырыаһыттар, дэгэрэҥ ырыа күөн-күрэстэрин кыайыылаахтара, Христофор Максимов Фондатын эдэр көлүөнэ ыччат Ассоциациятын салайааччыта Василий Местников, чилиэннэр Ньургуйаана Никитина, Василий Новоприезжай, Андрей Никитин кыттыыны ыллылар.
Сахалыы дэгэрэҥ ырыаны сайыннарар сыаллаах үлэлиир Христофор Максимов Фондатын, дьиэ кэргэнин аатыттан төрөппүт уола Трофим Христофорович Максимов: “Хааччах кэмигэр патриотическай хайысхалаах кэнсиэр буолла. Саха утумун, төрүт культуратын уонна ырыатын үйэтитэргэ билиҥҥи олох тэтимигэр сөп түбэһэр” — диэн бэлиэтээтэ уонна үбүлүөйдээх сылга күүс-көмө, улахан өйөбүл буолбут дьоҥҥо барҕа махтал тылларын анаата.
Христофор Максимов төрүттээбит дэгэрэҥин ырыата салгыы да сэгэйэн, сэгэлдьитэн, дэгэтэн, дэгэрэҥнэтэн саха эйгэтин аартыгынан айанната, дэгэрэҥ ырыа түһүлгэтэ төрүттэнэ туруохтун!
