Тымныы полюһугар сытар Ытык Өймөкөөн сиригэр ыытыллыбыт 16-с Олоҥхо ыһыаҕар дуоһуйа сылдьан кэлбиппэр култуурам управлениетыгар, улуустааҕы Олоҥхо ассоциациятыгар барҕа махтал буоллун. Көрөн-истэн, аһатан, сымнаҕастык айаннатан илдьэ сылдьыбыт эдэр коллегаларбар «Олоҥхо» дьиэтин үлэһиттэригэр сиртэн халлааҥҥа диэри барҕа махтал. Өймөкөөн айылҕата кэрэтин сөҕө-махтайа көрөн хаартыска бөҕөҕө түһэн, үлэлиир кэммэр алтыспыт коллегаларбын, учуонайдарбын көрсөн кэпсэтэн, өйдөбүнньүк буолар хаартыскаланан уо.д.а. кэрэ бэлиэ түгэннэринэн баай кэмнэрим умнуллубат буоллахтара.
Бастакы Олоҥхо ыһыахтарын кытта тэҥнээн көрдөххө олоҥхо, фольклор бары көрүҥнэрэ, иис-күүс, уустар үлэлэрэ балысханнык да сайдыбыт эбит. Бэйэлэрин көрүҥнэрин баһылыы сылдьар эдэр кыттааччылар элбээбиттэрэ уонна түҥ былыргы саха үгэстэрин тилиннэрэ- сайыннара сылдьаллара киһини үөрдэр. Атын түүр омуктурга үгэспитин тута сылдьарбыт үтүө холобур буолара махталлаах суол. Атын улуустартан туох үчүгэйдээхтэрин, ситиһиилээхтэрин көрөн ырытан бэйэҕит тускутугар туһаныахтааххыт дии саныыбын. Кыайыы-хотуу туһугар сүрдээх түмсүүлээхтик сылдьыбыт улуус аатыттан кэлбит кыттааччыларга барыгытыгар барҕа махтал буоллун. Кыайыылаахтарга, наҕараадаламмыттарга барыгытыгар эҕэрдэ. Эһиил Аммаҕа буолар ыһыахха өссө тупсан-киэркэйэн кыттаргытыгар баҕа санаабын этэбин.
Сивцева М.З., СР култууратын үтүөлээх үлэһитэ, Улуус олоҥхоһуттарын чинчийээччи, үөрэтээччи, үйэтитээччи.
