День Героев Отечества

Аҕа дойду Геройдарын күнэ биһиги улууспутугар үс геройдаах Байаҕантай нэһилиэгэр ыытылынна. Үөрүүлээх тэрээһин Россия Үлэҕэ Геройа М.Н.Готовцев аатынан Танда орто оскуолатын байыаннай-патриотическай кулууба (сал. Федосеев Р.А.) Кыайыы былааҕын уонна “Герой Егоров аатынан” совхоз социалистическай куоталаһыыга кыайбыт Үлэ, Албан Аат Знамялара киириитинэн саҕаланна.  Үс Геройдаах Байаҕантай нэһилиэгэ олохтоох автордар В.Бурнашев тылларыгар, М.Охлопков — Боххотойоп мелодиятыгар “Дьиэрэйдэр дьиэрэйиҥ” ырыанан эҕэрдэлээтилэр.

2019 сыл улууспутугар Геройдар сылларынан биллэриллэн, бу сылга ыытыллыбыт үлэлэринэн Уус Алдан улууһун аҕа баһылыга Федотов А.В. доклад оҥордо, Байаҕантай нэһилиэгин баһылыга Егоров С.И., Уус Алдан улууһун депутаттарын Советын председателэ, Улуу Кыайыы 75 сылын хамыыһыйатын солбуйар председателэ Колодезников И.И., Россия Үлэҕэ Геройа Готовцев М.Н., Советскай Союз Геройа В.Д.Лонгинов сиэн быраата Каркавин В.Ф., Бүтүн Россиятааҕы, республикатааҕы, улуустааҕы  научнай -практическай конференциялар, олимпиадалар кыайыылаахтара, Танда орто оскуолатын 11 кылааһын үөрэнээччитигэр Иван Егоровка тыл эттилэр, эҕэрдэлээтилэр.

Геройдар күннэрин чэрчитинэн, 9 бастыҥ көрдөрүүлээх дьоҥҥо Геройдарбыт ааттарынан Анал Бэлиэ уонна Стипендиа туттарылынна. Үлэ Геройа Д.Г.Бурцев аатынан анал бириэмийэ Гаврильева Аграфена Константиновнаҕа – СР Уус Алданнааҕы Российскай Федерация Пенсионнай Фондатын управлениятын пенсияны ааҕыы, суоттааһын, сыаналааһын отделын начальнигар, Үлэ Албан аат орденын толору Кавалера Н.Д. Бурнашев аатынан анал бириэмийэ Охлопков Александр Николаевичка – “СР Уус Алданнааҕы филиалын дьиэ-уот коммунальнай хаһаайыстыбатын” государственнай хааччахтаммыт тэрилтэтин суоппарыгар, Россия Геройа М.М. Стрекаловскай аатынан анал бириэмийэ Протопопов Юрий Николаевичка — “М.М.Стрекаловскай аатынан Өнөр орто оскуолатын” физкультураҕа уонна олоххо куттал суох буолуутун  төрүттэрин учууталыгар, Социалистическай Үлэ Геройа Е.И. Бурцева аатынан анал бириэмийэ Никонов Эдуард Агитовичка — Уус Алданнааҕы “Кииннэммит бухгалтерия тэрилтэтэ” муниципальнай бюджетнай тэрилтэ сүрүннүүр бухгалтерыгар, Аҕа дойду улуу сэриитин Геройа В.Д. Лонгинов  аатынан анал бириэмийэ Аммосов Максим Николаевичка – Уус-Алданнааҕы оҕо спортивнай оскуолатын тренерыгар, Социалистическай Үлэ Геройа А.С. Копырина аатынан анал бириэмийэ  Алексеева Александра Николаевнаҕа – тыа хаһаайстыбатын үлэҕэ ветераныгар, Гражданскай сэрии Геройа, культармеец Г.В. Егоров аатынан анал бириэмийэ Сыроватскай Андрей Дмитрьевичка —  Суотту орто оскуолатын олоххо куттал суох буолуутун  төрүттэрин учууталыгар, Российскай Федерация Үлэҕэ Геройа М.Н. Готовцев аатынан анал бириэмийэ Бурцев Александр Николаевичка -Уус-Алдан улууһун культураҕа управлениятын культурнай-маассабай тэрээһиннэрин уонна норуот айымньытын салаатын сэбиэдиссэйигэр, 6 бойобуой орденнар толору кавалердара, 4 сэрии кыттыылааҕа, гвардия майора Дмитрий Данилович Оллонов аатынан анал бириэмийэ, Окоемов Максим Николаевичка — Мүрү 2 №-дээх орто оскуолатын 10 кылааһын үөрэнээччитигэр туттарылыннылар.

Саха ырыатын тойугун толорооччу, этно ырыаһыт Любовь Константинова – Кыталы Куо,  Бороҕонтон “Тойон Мүрү”, Бээрийэттэн “Алаһа” үҥкүү бөлөхтөрө, “Дьиэрэй” народнай ансамбль, Анастасия Колодезникова ыллам ырыаларынан-үҥкүүлэринэн көрөөччү биһирэбилин ыллылар.

Геройдар сылларыгар ыытыллыбыт  нэһилиэктэр сыл устата тугу ситиспиттэрин, үлэлэрин-хамнастарын отчуоттаан альбом-рапорт туттарылынна.

2020 сыл – улууспутугар Улуу Кыайыы 75 сылынан биллэриллэн Сыл бэлиэтэ Кыайыы 75 сыллаах хамыыһыйатын солбуйар председателигэр Колодезников И.И., Уус Алдан улууһун баһылыгын солбуйааччытыгар Борисов М.В., Уус Алдан улууһун ветераннарын советын председателигэр Калининскай И. С. туттарылынна. Быйылгы сылга улууспутугар Дьоруойдар сыллара биллэриллэн музейдар улэлэрэ сүрүннээн улууспут Дьоруойдарыгар ананна. Ол курдук бүгүн эмиэ Үс Дьоруойдаах Байаҕантай нэһилиэгэр Россия Дьоруойдарын күнүгэр Танда музейыгар улуус музейдарын улахан холбоһуктаах быыстапката турда. Быыстапка улууспут үлэ албан аат, аҕа дойду, гражданскай сэриилэр дьоруойдарын хорсун быһыыларын, үлэлэрин, олохторун туһунан кэпсиир киэҥ ис хоһоонноох. Кэлбит ыалдьыттар Дьоруойдарбыт килбиэннээх үлэлэрин иһин, уоттаах сэрии кыргыһыыларыгар хорсун быһыыларын иһин ылбыт, Дьоруой буолбуттарын туоһулуур кыһыл сулустарын, уордьаннарын, мэтээллэрин  илэ харахтарынан сэргии көрдүлэр. Ону тэҥэ Дьоруойдарбыт тутта сылдьыбыт маллара, кэппит параднай көстүүмнэрэ, бойобуой суолларын сырдатар фроҥҥа сылдьан суруйбут дневниктара, суруктара сэдэх экспонат буолан быыстапканы киэргэттилэр. Дьоруойдарбыт оҕолоругар, чугас аймахтарыгар улууспутугар Геройдар сылларын түмүктүүр тэрээһиннэ кэлэн күүс-көмө буолбуттарыгар махталбытын тиэрдэбит.

{"autoplay":"true","autoplay_speed":3000,"speed":300,"arrows":"true","dots":"true"}

Добавить комментарий

Ваш адрес email не будет опубликован. Обязательные поля помечены *