Ырыа куттаах бэтэрээннэр

Улуу Кыайыы 75 сылын көрсө, эдэр көлүөнэҕэ патриотическай тыыны иҥэрэр, күргүөмүнэн ырыаны толоруу маастарыстыбатын үрдэтэр, урукку кэминээҕи ырыалары сөргүтэр, үйэтитэр сыаллаах-соруктаах, бэтэрээннэр ансаамбылларын икки ардыларыгар «Ырыа куттаах бэтэрээннэр» 6-с төгүлүн ыытыллар ырыа күөн күрэһэ, сэтинньи 4 күнүгэр, П.П. Оготоев аатын сүгэр Кэптэни сынньалаҥ киинигэр ыытылынна. Күөн күрэскэ улууспут 6 нэһилиэктэриттэн 7 ансамбл, барыта 77 киһи кыттыыны ылла. Кыттааччылар балаһыанньа быһыытынан 2-лии ырыаны толордулар.  Онтон 1 ырыа сэрии кэминээҕи, кыайыы ырыалара, 2-с ырыалара көҥүл темаҕа. Күөн күрэһи 3 киһиттэн састааптаах дьүүллүүр сүбэ сыаналаата: Бурнашева А.Н., Кэптэнитээҕи «Чэчир» оҕо уһуйаанын ырыаҕа уһуйааччыта, улууска культура уонна үөрэх сайдыытыгар киллэрбит кылаатын иһин анал бэлиэлэр хаһаайкалара, Лугинова З.П., СӨ үөрэҕириитин уонна ыччакка политикатын туйгуна, өрөспүүбүлүкэтээҕи «Ыллаа-туой, уол оҕо» ырыа куонкурсун ааптара, Федорова А.Е., улуустааҕы культура управлениетын кылаабынай специалиһа, СӨ култууратын туйгуна.

Күөн-күрэс түмүгүнэн кыайыылаахтарынан буоллулар:

3 степеннээх дипломант — «Сыдьаайа» ансамбль, Мындааба. Салайааччы Индеева А.Р.

2 степеннээх дипломант — «Алгыс» ансамбль, Майаҕас. Салайааччы Иванов К.С.

1 степеннээх дипломант — «Айылгы» ансамбль, Түүлээх. Салайааччы Винокурова М.А.

3 степеннээх лауреат — «Аал уот» ансамбль, Кэптэни. Салайааччы Федорова В.К.

2 степеннээх лауреат — «Ыллык» эр дьон ансамбла, Майаҕас. Салайааччы Иванов К.С.

1 степеннээх лауреат — «Иэйии» ансамбль, Дүпсүн. Салайааччы Сивцева А.Д.

Онтон күөн күрэс мунур кыайыылаахтарынан буолан Гран-при үрдүк аатын ыллылар Курбуһах нэһилиэгиттэн «Өрөгөй» эр дьон вокальнай ансамбла. Салайааччы Нафанаилова С.К.

Маны таһынан «Бастыҥ доҕуһуол» анал ааты Курбуһахтан Слепцов А.К., «Бастыҥ салайааччы» анал ааты Майаҕастан Иванов К.С. ыллылар.

Быйылгы күөн күрэскэ Майаҕастан, Курбуһахтан эр дьон ансамбллара кыттыыны ылбыттара кэрэхсэбиллээх. Олоххо көхтөөх аҕа саастаах дьоммут куруук да бу курдук олох үөһүгэр буолан, ыллыы-туойа, чэгиэн, доруобай сылдьыҥ диэн баҕа санаабыт бастыҥын аныыбыт. Эһиил 7-с төгүлүн ыытыллар күөн күрэскэ көрсүөххэ диэри, ырыа куттаах бэтэрээннэрбит!

 

Анна Федорова.

Сэтинньи 5 күнэ, 2019 сыл

[meta_gallery_slider id=»3215″]

error: МБУ \"Усть-Алданское управление культуры\"