Улууспут дьаралыга кустук араас өҥүнэн күлүмүрдээтэ

Ыам  ыйын 31 күнүгэр Саха сирин саамай сыаналаах баайдара хараллан турар ГКУ «Гохран РС(Я)»  «Сокровищница Р(Я)» быыстапкалыыр саалатыгар И.П.Готовцев аатынан  Тандатааҕы историко-архитектурнай музей коллекцията бэйэтэ анал экспозиция быһыытынан көрдөрүүгэ туруоруллунна. Быыстапка аһыллыыта үөрүүлээх быһыыга-майгыга ыытылынна. Ыҥырыылаах ыалдьыттар ортолоругар Байаҕантай нэһилиэгин Баһылыга Егоров  Савва Иванович, Уус Алдан улууһун култуураҕа управлениетын начальнигын солбуйааччы Павлова Лена Семеновна, Ил Түмэн  бэрэссэдээтэлин солбуйааччы Александр Николаевич Жирков, республика үйэлээх тутууларын хараанныыр департамент  салайааччыта Николай Афанасьевич Макаров, Уус Алдан уонна Дьокуускай куорат түмэллэрин директордара, специалистара бааллар. Жирков А.Н.тыл этиитигэр, өрүүтүн буоларын курдук, музейдар үлэлэрин инники соруктарын чопчулаата уонна Танда музейын бу бырайыагын сэргиирин иһитиннэрдэ. Макаров Н.А. республика сиригэр-уотугар баар памятниктар туруктарын туһунан этиитигэр Танда  музейа памятниктары харыстааһыҥҥа ыытар үлэтэ атыттарга холобур буоларын бээлиэтээтэ. Памятниктары чөлүгэр түһэриигэ улахан хамсааһыннар саҕаланан эрэллэрин эттэ. Норуоднай поэт Иван Васильевич Мигалкин музейдар общество олоҕор сүҥкэн оруолларыгар тохтоото. Танда музейа республика улахан музейдарын бырайыактарыгар ситиһиилээхтик кыталларын олус сэргиирин биллэрдэ. Ити курдук, сүрдээх дириҥ ис хоһоонноох, кэскили кэрэһэлиир этиилэри бу киэһээ элбэҕи иһиттибит. Быйыл саас кулун тутар 25-29 күннэригэр үс геройдаах Байаҕантай нэһилиэгэ Дьокуускай  куорат культурнай, спортивнай кииннэригэр нэһилиэк күннэрин киэҥ далааһыннаахтык тэрийэн ыыппыта. Бу күннэр чэрчилэринэн
«Строительнай рынок» быыстапкалыыр саалатыгар «Үс Геройдаах Байаҕантайдар» улахан быыстапка тэнитиллибитэ. «Сокровищница РС (Я)» үлэһиттэрэ бырааттыы Заболоцкай Иван, Александр Ивановичтар ыҥырыыларынан бу быыстапканы көрөн-истэн баран, Танда музейын специалистарыгар кинилэр саалаларыгар быыстапка туруорарга этии киллэрбиттэрэ. Ол кэпсэтии түмүгүнэн бэйэлэрэ Тандаҕа тахсан музей фондатын көрөн-истэн экспонаттары талбыттара.Онтон интернет нөҥүө докумуоннары чөкөтүү, афиша оҥоруу үлэтэ барбыта. Быыстапкалыыр саала специалистара Андрей Петрович Захаров, Николай Викторович Винокуров, Вера Гаврильевна Апросимова сүрдээх тэрээһиннээх, таһымнаах, ирдэбиллээх үлэлэрин түмүгэр барыта ситэн — хотон испитэ. Сайыҥҥы кэмҥэ биһиэхэ өрүү да айан ылбычча табыллыбат буолааччы. Танда биир уопуттаах,кыһамньылаах суоппара Владимир Владимирович Неустроев  паром сырыыта саҕаланаатын кытары Тандаттан куоракка  киллэрэн, болдьообут кэммитигэр  куорат килбэйэр киинигэр турар Комдрагмет   дьиэтин иннигэр хорус гына тохтоотубут. Онон хаһыат нөҥүө, бар дьон иннигэр, Владимир Владимировичка махталбытын тиэрдэбит. Быыстапкаҕа барыта 143 мал көрдөрүүгэ турда. Манна үрүҥ көмүс киэргэллэр, олор ортолоругар Советскай Союз Геройа Владимир Дионисьевич Лонгинов ийэтинэн аймахтара Орто Халыма куоратын Нифонтовтара 1977 сыллаахха музейга бэлэхтээбит көмүс курдара биир дьоһун миэстэни ылар, чаанньыктар, көмүс сирэйдээх ыҥыырдар, удьурхайтан, мастан оҥоһуллубут иһит- хомуос, музейы төрүттээбит Готовцев Иван Павлович тус маллара уонна кини туһунан  матырыйааллар олус тупсаҕай витриналарга, поставкаларга, мындырдык таҥыллан ууруллубуттарын оннооҕор биһиги күн аайы көрөр дьон сөҕө,сонургуу көрдүбүт. Бу быыстапкаҕа Заболоцкая — Яковлева Екатерина Ивановна,Александр, Иван Заболоцкайдар, эдэр талааннаах 
Варвара Соловьева үлэлэрэ  түҥ былыргы өбүгэлэрбит оҥоһуктарын кытта  сэргэ көрдөрүллүбүттэрэ быыстапка ис хоһоонун дириҥэтэн, көстүүтүн киэргэтэн биэрдэ. Манна даҕатан эттэххэ, Варвара Соловьева  быыстапка афишатын, ыҥырыытын таҥан оҥорууга үлэлэспитигэр истиҥник махтанабыт. Танда музейын быыстапкатыгар,Саха сирин күндү баайдара харалла сытар мааны саалатыгар, Уус- Алдан улууһун дьаралыга дьиҥнээх алмаастарынан таҥыллан кустук араас өҥүнэн
күлүмүрдүү оонньоото. 

Ефросиния
Колодезникова музеевед, журналист

[meta_gallery_slider id=»2597″]