Олунньу 21 күнэ, нэһилиэктэр икки ардыларыгар ыытылла турар бэстибээл иккис күнэ.
Дьүүллүүр сүбэ чилиэттэрэ төһө да кыһыңңы ый буоллар, сааскылыы чаҕылхай күн арыалланан, Найахы сиригэр кэлэммит Илья Иванович Артамонов аатынан сынньалаң киин аанын аһан киирэбит. Киирээппитин кытта биһигини И.И. Гоголев-Дыргыабай аатынан орто оскуола үөрэнээччилэрэ, учууталлар, олохтоохтор эҕэрдэлии көрсөллөр.
Салгыы оскуола оҕолоро быыстапка ис хоһоонун доргуччу билиһиннэрбитинэн бардылар.
Найахы нэһилиэгиттэн 135 буойун барбытыттан, 131 буойун ийэтэ биллибитин кэпсээтилэр. Сэдэх экспонакка Сивцев Алексей Петрович (1904 с. төрүөх) сэриигэ илдьэ сылдьыбыт флягатын көрдөрдүлэр. Найахы нэһилиэгин историятын үөрэтэн уопсайа 4 кинигэ бэчээттэнэн тахсыбыт эбит. Ол кэннэ чинчийэр үлэлэрин быспакка салҕыы үлэ бара турар, ол курдук оскуола оҕолоро буойун кимтэн-хантан сыдьааннаахтарын үөрэтэн альбом оҥорон туруорбуттара кэрэхсэбиллээх. 80 саастаах кырдьаҕас Любовь Григорьевна Готовцева сэрии сылын инниттэн хаһыат матырыйаалларын муспута, урукку ахтыылар альбомнара быыстапканы киэргэттэ.
Уус-уран самодеятельность кэнсиэрин биир тыынынан көрдүбүт.
Найахы хорун толоруутугар Николай Егоров-Баайаҕыын тылларыгар, Павел Акимов мелодиятыгар “Кэриэстэбил” ырыаны көрөөччүлэр бары сүһүөххэ туран, дьоллоох олох туһугар сэриилэспит биир дойдулаахтарбытын чиэстээн, кэриэстээн, ис дууһаттан сөңүөрэн туран иһиттибит. Хас биирдии нүөмэрдэр бэйэ-бэйэлэриттэн ситимнэһэн кэнсиэр ис хоһоонун байытан, киэргэтэн, ырыалар ис хоһооннорунан үңкүүнэн арыалланан, кэнсиэр үрдүк таһымнаахтык ааста. Бэстибээл арыйыытынан саңа аат Иван Фомин буолла. Кэнсиэри Анисия Гаврильева кыайа-хото тутан ыытта.
Дьүүллүүр сүбэ быһаарыытынан бэстибээл лауреаттарынан буоллулар:
• наһаа нарын тойуктаах Найахы норуодунай хора;
• улууспут күүстээх куоластаах ырыаһыттара Афанасий Новоприезжай, Евдокия Фомина;
• ”Баллада о солдате”, “Огонек” ырыалары үрдүк таһымңа толорбут “Айхаллан”, “Найахыына” ансаамбыллар;
• педагогическай үлэ бэтэрээнэ, Кыайыы сылын оҕото Любовь Григорьевна Готовцева салайар хомусчуттарын бөлөҕө;
• Анисия Гаврильева, Александр Соловьев, Данил Яковлев киһи сүрэҕин долгутар уус-уран ааҕыылара;
• ”Чэлгийээнэ” үңкүү бөлөҕө доҕуһуоллаах найахылар биир дойдулаахтара Андрей Степанов хоһоонугар, күндү күтүөттэрэ Станислав Луковцев мелодиятыгар “Сэттэ кут туруйа” ырыаны толорбут квартет;
• Кыайыы оһуохайын таһаарбыт айылҕаттан ийэ кылыһахтаах педагогическай үлэ, сыана бэтэрээнэ Елизавета Рожина.
Түмүккэ Найахылар быыстапкаҕа 4,2, кэнсиэргэ 4,6 бааллары ыланнар, уопсай бааллара 4,40 тэңнэстэ.
Ааспыт үйэ 60-с сылларыгар Найахы кулуубугар директорынан үлэлээбит, Саха АССР култууратын үтүөлээх үлэһитэ Илья Иванович Артамонов үйэлэри өтө көрөн, Семен Гаврильевич Васильевы тылыгар киллэрэн ыңыран үлэҕэ ылан, оччоттон баччаҕа диэри Найахы дьоно хордарын өрө тутан, көлүөнэттэн көлүөнэҕэ “Найахы хора дуо” дэтэн, үтүө дьоннорун ааттарын өрө тутан кэллилэр.
Быйыл Семен Гаврильевич Васильев үбүлүөйдээх сыла. Кини төрөөбүтэ 95 сылынан олунньу 24 күнүгэр Дьокуускай куоракка Национальнай библиотека историческай саалатыгар ≪төгүрүк остуол≫, олунньу 25 күнүгэр “Россия – моя история” түмэлгэ Бүтүн Арассыыйатааҕы хоровой бэстибээл регионнааҕы этааба кини аатынан ыытыллыахтара.
Найахы дьонугар бу тэрээһиннэргэ ситиһиилээхтик кытталларыгар, кыайыы көтөллөөх кэлэллэригэр баҕарыаҕың!
Анна Лугинова, Клара Крылова.
