Ытыктабыллаах Раиса Реасовна!

Ытыктабыллаах Раиса Реасовна!

Уус Алдан улууһун дьаһалтатын, культураҕа управлениетын, улуус бары культуратын үлэһиттэрин, ветераннарын ааттарыттан Эйиигин, Российскай Федерация, Саха Өрөспүүбүлүкэтин култуураларын үтүөлээх үлэһитин, Суотту нэһилиэгин, Уус Алдан улууһун бочуоттаах олохтооҕун, күн сирин көрбүт кэрэ-бэлиэ күҥҥүнэн, өрөгөйдөөх 85 сааскынан
ис сүрэхтэн эҕэрдэлиибит!?
Саха литературатын төрүттээччи, бэйиэт, наука араас көрүҥнэригэр маҥнайгы оҥкулу оҥорбут чинчийээччи, гуманист-философ А.Е.Кулаковскай – Өксөкүлээх Өлөксөй утумун салҕааччы, удьуора буолаҥҥын үгүс үлэни ыытаҥҥын, улуус, өрөспүүбүлүкэ култуурата сайдыытыгар сүҥкэн кылааккын киллэрбиккин сыаналыыбыт, махтанабыт, сүгүрүйэбит. Саха норуота улуу нуучча норуотун кытта эйэлээх бииргэ буолуутун кэрэһэлиир, аһаҕас халлаан анныгар тутуллубут “Доҕордоһуу” музей төрүттэниитигэр, атаҕар туруутугар, норуодунай суруйааччы, Социалистическай Үлэ Геройа, П.А.Ойуунускай аатынан судаарыстыбаннай бириэмийэ лауреата, Өрөспүүбүлүкэ бочуоттаах олохтооҕо Д.К.Сивцев-Суорун Омоллоону кытта үгүс үтүмэн үлэни ыыппытыҥ. 1988-2006 сылларга директорынан үлэлиир кэмнэргэр музей аан дойду таһымыгар тахсыытыгар, билиниини ылыытыгар, саха норуотун култуурунай нэһилиэстибэтэ буолуутугар үгүс үлэ ыытыллыбыта.
Күн бүгүн Суорун Омоллоон аатын сүгэр “Доҕордоһуу” музей-заповедник кэлэр кэнчээри ыччакка дьоһун бэлэх буолан, үйэлэргэ хаалар улахан култуурнай, туристическай киин буолла.
Ытыктыыр, убаастыыр киһибит Раиса Реасовна!
Эн үгүс сыллаах үтүмэннээх үлэҥ үрдүктүк сыаналанан Саха Өрөспүүбүлүкэтин Ил Дарханын “Саха Өрөспүүбүлүкэтин социальнай-экономическай сайдыытыгар сүҥкэн кылаатын киллэрбитин иһин” Анал бириэмийэ лауреата буолбутуҥ.
Өссө да уһун сылларга улуу Өксөкүлээх сиэнэ буолаҥҥын, халыҥ аймах дурдата-хаххата буолан, чэгиэн чэбдик туруктаах уһун олоҕу олороргор, өй-санаа өттүнэн сүбэ-ама буола тураргар баҕарабыт!!!