Хоноҕордооҕу «Түһүлгэ» СК бөһүөлэккэ бастакы кулууп үлэтин саҕалаабыта 60, «Илгэ» фольклор ансаамбыла тэриллибитэ 35 сыллара

Ахсынньы 17 күнүгэр Хоноҕордооҕу «Түһүлгэ» СК бөһүөлэккэ бастакы кулууп үлэтин саҕалаабыта 60, «Илгэ» фольклор ансаамбыла тэриллибитэ 35 сылларыгар аналлаах Суотту нэһилиэгин талааннаах дьонун биир түһүлгэҕэ түмэн үрдүк үөрүүлээх тэрээһин буолан ааста.
Манна кыттыыны ыллылар Суотту нэһилиэгин баһылыга Иванов В.И., Уус Алдан улууһун култуураҕа управлениетын начальнига Аммосов И.И., биир дойдулаахпыт Заровняев Б.И., Суоттубут уус уран самодеятельноһын кыттыылаахтара. Кулууп историятын кэпсиир уонна талааннаах дьоммут Иванова Е.И., Бочкарева П.В. үлэлэрин сырдатар быыстапка турбута мустубут дьон болҕомтотун тарта.
Тэрээһин арыллыытыгар саха сиэринэн алаадьынан айах туттулар бука барыбытын оһуохайга ыҥырдылар. Оһуохайы сынньалаҥ киин уус уран салайааччыта Бубякина В.С. таһаарда.
Икки бүк үбүлүөйдээх киэһэни олоҥхонон Хоноҕор оскуолатын үөрэнээччилэрэ, чабырҕаҕынан «Утаһын» чабырҕах бөлөҕө, саха норуотун ырыатынан «Түһүлгэ» СК үлэһиттэрэ, Н.Ордахов толоруутугар хомус дьүрүскэн тыаһынан саҕалаатылар. Кэлбит ыалдьыттар алгыс тыллара, үтүө баҕа санаалара «Илгэ» ансаамбыл кыттыылаахтарыгар ананнылар. 60 сыл усталаах туоратыгар кулуупка үлэлээн ааспыт дьон махталынан ахтылыннылар.
Дьоро киэһэ үөрүүлээх чааһын Суоттубут талба талааннаах кыыһа, «Хотугу Сулус» телерадиоакадемия редактора С.С. Лебедева сценарийдаан, иилээн-саҕалаан ыыппыта тэрээһин үрдүк таһымнаахтык барарыгар олук буолла.
Салгыы көрөөччүлэргэ анаан улахан концерт көрдөрүлүннэ. Суоттубутугар, Хоноҕор бөһүөлэгэр, Уус Алданнааҕы техникумҥа ырыаҕа, үҥкүүгэ талааннаах, көхтөөх, түмсүүлээх ыччаттардаахпытынан, дьонноохпутунан-сэргэлээхпитинэн өссө төгүл киэн тутуннубут, кэрэхсээтибит, сөхтүбүт-махтайдыбыт.
Бу улахан кэрэхсэбиллээх, үчүгэй тэрээһиннээх икки үбүлүөйдээх тэрээһини көҕүлээн, салайан, тэрийэн ыыппыт «Түһүлгэ» СК дьоҕус коллективыгар, салайааччы Е.Н. Гоголеваҕа, бары кыттыыны ылбыт талба талааннаах дьоммутугар умнуллубат үтүө түгэни бэлэх ууммуккутугар барҕа махталбытын көрөөччүлэр, кыттыылаахтар ааттарыттан тиэрдэбит!
Черкашина Р.Н.