Уус Алдан улууһун спортсменнара соргулаах түһүлгэҕэ алгыһы сиэр быһыытынан үһүйээҥҥэ кэпсэммит, номоххо ахтыллыбыт дуулаҕа күүстээх Майаҕатта Бэрт Хара төрөөбүт алааһыгар кыыс Хаҥаҕа ыллылар

     Спортсменнарбыт соргулаах түһүлгэҕэ алгыс ыллылар. Сарсыҥҥаттан спортивнай оонньууларбыт итии-буһуу күннэрэ саҕаланыахтара. Уус Алдан спортсменнара ол иннинэ соргуга сирдиир алгыс ыллылар. Ол тэрээһин сиэр быһыытынан үһүйээҥҥэ кэпсэммит, номоххо ахтыллыбыт дуулаҕа күүстээх Майаҕатта Бэрт Хара төрөөбүт алааһыгар кыыс Хаҥаҕа ыытылынна.
     Улуус улуус аайыттан дойдуларын сураҕырдаары анаан минээн, аат ааттаан кэлбит ааттаахтардыын илин-кэлин түсүһэр, күүс холоһор бастыҥ спортсменнарбыт алгыһы аҥаар тобуктарыгар тирэнэн сөһүргэстээн туран ыллылар. Алгысчыт Павел Окоемов уран тыл имэҥинэн арчылаан, алҕаан быһыйдарбытын, бөҕөлөрбүтүн, бэргэннэрбитин, сытыы өркөн өйдөөхтөрбүтүн улахан кыайыыларга ыҥырда. Спортсменнарга анаан баҕа санааларын, кэс тылларын Ил Түмэн дьокутаата Геннадий Васильев, улууспут баһылыга Алексей Федотов, улуус спордун салайааччыта Константин Давыдов анаатылар. Спортсменнар ааттарыттан харда тылы Амматааҕы оонньуулар чөмпүйүөннэрэ Евгений Алексеев эттэ.
     Түмүккэ спортсменнарбыт соргуну ыҥырар оһуохайга төгүрүччү хаамтылар. Ол кэнниттэн кинилэри Бэрт Ууһун далбар хотуттара алгыстаах быырпаҕынан айах тутан атаардылар.

Пресс-центр культурных мероприятий VIII Спортивных игр народов Республики Саха (Якутия)