МБУ "Усть-Алданское управление культуры" Саха Республикатын норуотун маастара, биллэр тимир, көмүс ууһа Петухов Гаврил Гаврильевич төрөөбүтэ 70 сылыгар аналлаах «Тарбах талаана — өй өрөгөйө» ахтыы киэһэтэ муус устар 7 күнүгэр, В.В. Никифоров-Күлүмнүүр аатынан «Тойон Мүрү» култуура дыбарыаһыгар буолла.
Гаврил Гаврильевич айар улэтин көрдөрөр быыстапка турда. Быыстапкаҕа үрүҥ, кыһыл көмүстэн элбэх киэргэллэр, тайах муоһуттан кыыннаах, уктаах саха быһахтара, аан дойдуга аатырбыт Чыҥыс Хаан төрөөбүтэ 845 сылыгар, Монголия государствота тэриллибитэ 800 сылыгар анаан оҥорбут шедевр батыйата дьон сэҥээриитин ылла. Ахтыы киэһэтин ыпсаран-хопсорон, олус истиҥник ыытта култуурабыт бэтэрээнэ, Гаврил Гаврильевиһы кытта тэҥҥэ алтыспыт Мария Дмитриевна Макеева. Ахтыыны оҥордулар кини бииргэ төрөөбүттэрэ Петр Гаврильевич, Семен Гаврильевич, Виктория Гаврильевна, аймахтара Прасковья Степановна Крылова, оҕо сааһын доҕоро Петр Сергеевич Нафанаилов, бииргэ үлэлээбит, араас быыстапкаларга тэҥҥэ сылдьыспыт Прокопий Михайлович Колодезников, Роман Ильич Готовцев, культура бэтэрээнэ Мария Захаровна Сивцева, культура управлениетын начальнига Иннокентий Иннокентьевич Аммосов, ыала Мария Михайловна Петухова. 2011 с. НВК Саха Технополис биэриитигэр биир дойдулаахпыт Александр Лебедев устубут биэриитин көрдүбүт. Ыллам ырыатын бэлэхтээтэ Константин Слепцов. О5олоро Ньурбаттан, Булууттэн, Дьокуускай куораттан кэлэн кыттыыны ыллылар, тэрийистилэр. Гаврил Гаврильевич Петухов көмүс, тимир ууһун быһыытынан республикаҕа бэйэтин кэмигэр биир бастакылара этэ.
Биһиги улууспутугар маннык биир сүдү киһи, улахан уус олорбут олоҕун үйэтитэргэ өссө да үлэлэһиэхпит.
