МБУ "Усть-Алданское управление культуры" Үөрүүлээх өрөгөй күн буолан ааста. Ол курдук саха сиригэр автономия 100 сылынан уонна 2022 сылга биһиги улууспутугар ыытыллар Саха сирин норуоттарын VIII-c спортивнай оонньууларын көрсө, 2021 сыл — улууска биллэриллибит Сомоҕолоһуу уонна айымньылаах үлэ сылыгар Уус Алдан улууһун «Удьуор утум» кылдьыттарын түмсүүтэ бастакынан төрөөбүт улууспутугар көмө быһыытынан 100 устуука үҥкүүгэ туттуллар оҕо дэйбиирин, 100 миэтэрэ Аартыктарга туттуллар салама ситиитин биэрэргэ быһаарынан, бэйэлэрин кылааттарын киллэрэн улуус олохтоохторугар күүс көмө буолалларыгар ыҥырыы таһаарбыттара. «Удьуор утум» кылдьыттар түмсүү (салайааччы Петрова Мария Егоровна) бачыымнарын өйөөн СР норуотун маастара Мария Семеновна Атласова, СР уус-уран оҥоһуктарга маастара Иван Иннокентьевич Окоемов 100 устуука олбох оҥорорго быһаарыммыттара. Онтон сиэттэрэн «Арчы» туосчуттар түмсүүлэрэ 30 миэтэрэ салама, чороон уустара 100 устуука чороон, «Бэрт Ууһун уустара” түмсүү норуокка күүстээҕинэн биллибит Майаҕатта Бэрт Хара батыйатын, быһаҕын, ох саатын, СР норуотун маастара Прасковья Степановна Крылова оҕуруоттан улуус гербэтин, 3 саас оскуола харысхал оҥорон биэрэн бу бачыымы өйүүбүт диэн быһаарыммыттара.
Түмсүү салайааччылара тыл этэннэр улуус баһылыгар Алексей Васильевич Федотовка махтал сурук туттаран туран оҥоһуктарын бэлэх ууннулар.
Алексей Васильевич махтал тылларын этэн туран Уус-Алдан улууһун Социальнай экономическай сайдыытыгар киллэрбит кылаатын иһин бэлиэни туттарда Саха Өрөспүүбүлүкэтин норуотун маастарыгар Дегтярева Татьяна Гаврильевнаҕа, Уус-Алдан улууһун норуотун маастара ааты туттарда Бээрийэ «Арчы» туосчуттар түмсүүлэрин чилиэнэ Васильева Прасковья Артемовнаҕа. Махтал суруктары туттарда «Удьуор утум» «Арчы» “Бэрт-Ууһун уустара” “Чороон уустара” “Үһүс саас оскуола”түмсүүлэр салайааччыларыгар, уонна Крылова Прасковья Степановнаҕа, Атласова Мария Семеновнаҕа, Окоемов Иван Иннокентьевичка.
Улуус культураҕа управлениятын начальнига Аммосов И.И. махтал тылларын этэн туран ахсынньы ый 5 күнүгэр Дьокуускай куоракка «Симэх» национальнай кииҥҥэ Саха Республикатын бырабыытылыстыбатын солбуйааччыта Сергей Местников бастыҥ үлэлээх маастардарга уонна общественнай түмсүүлэргэ анал харчынан сертификаттары туттарбытын туһунан иһитиннэрдэ. Биһиги улуустан Мичил Бурцев( Чараҥ) Чороон оҥоһуута, Харитина Гоголева (Найахы) кымыс иһитэ, «Арчы» туосчуттар түмсүүлэрэ (Бээрийэ, сал Варвара Васильева) оҥоһуктара бастыҥ эталоннай үлэлэлэргэ киирдилэр. Маны таһынан «Мындыр» улуустааҕы уустар түмсүүлэригэр анал бириэмийэ туттарыллыбытын туһунан билиһиннэрдэ. Тэрээһин Константин Васильев «Дойдум миэнэ Уус-Алдан» ырыатынан өрө күүрүүлээхтик түмүктэннэ.
