Саха Өрөспүүбүлүкэтигэр – ХОМУС КҮНЭ!

Сахалыы таҥаспытын сайбаччы кэтэммит, ытыс
ымыыта хомуспутун ытыспыт
иһигэр ыксары тутаммыт
Хомуска күргүөмүнэн тардыы – флешмобугар муһуннубут.

Сэтинньи 30 күнэ өрөспүүбүлүкэҕэ Хомус күнэ. Төрүт дорҕоону киһи-аймах бу Орто дойдуга айыллыаҕыттан тулалыыр айылҕатыгар, итэҕэлигэр, олоҕор-дьаһаҕар сыһыаннаан, айан-тутан үөскэппитэ. Үтүмэн үйэлэртэн төрүт дорҕоон кэм-кэрдии уларыйыытыгар сөп түбэһиннэрэн, сороҕор күн-дьыл бэйэтэ кистэлэҥин арыйан, киһи өйүнэн, сүрэҕин иэйиитинэн, ураты тыынынан аан дойду олохтоохторун сөхтөрүөн сөхтөрөр. Саха хомуһугар бүтүн норуот төрүт култуурата, өбүгэ утума арылхайдык көстөр.
Бүгүн улууспут үрдүнэн бүттүүн лыҥкыныыр тыастаах Хомус дьоро күнүнэн хохуоралаах тыллаах хомуспутун хоҥкунатан, күргүөмүнэн хомуска оонньооһун ыытылынна!
Улууспут киинигэр, “Олоҥхо Дьиэтэ” этнокультурнай кииҥҥэ күргүөмүнэн хомус оонньуутугар барыта 150 киһи кыттыыны ылла.Күргүөм хомус оонньуутун таһаардылар Дүпсүҥҥэ ыытыллыбыт СӨ образцовай коллектива “Кэскил” хомусчуттар ансамблларын төрүттээччилэриттэн биирдэстэрэ, “Ситим” ветераннар ансамблларын төрүттээччи, үлэ ветерана, Дүпсүн нэһилиэгин бочуоттаах олохтооҕо Мария Михайловна Соловьева аатынан “Хомус ситимэ” улуустааҕы хомусчуттар күрэхтэрин Кылаан Чыпчаал кыайыылааҕа Прокопий Степанов уонна Мэҥэ-Хаҥалас улууһугар “Олонхофест”, “НеоОлонхо — 2022” өрөспүүбүлүкэтээҕи ыччат фестивалыгар “Төрүт дорҕоон” күрэҕин Кылаан Чыпчаал кыайыылааҕа Федот Винокуров.
Тэрээһиҥҥэ көхтөөх кыттыыны ыллылар Курбуһах, Байаҕантай, 2-с Лөгөй, Дүпсүн, Мүрү, Өлтөх нэһилиэктэрэ