МБУ "Усть-Алданское управление культуры" 4 түмэр түһүлгэҕэ барыта 50 киһи 17 нэһилиэктэн кыттыны ыллылар.
Улуус таһымнаах 10 общественнай түмсүүлэр: Россия ийэлэрэ, дьахтар сүбэтэ, ветераннар түмсүүлэрэ, «Умсулҕан» коллекционердар кулууптара, «Уһуктуу» литературнай, «Кэскил түһэ» түмсүүлэрэ, үҥкүүһүттэр, хомус, олоҥхо, краеведтар холбоһуктара кытыннылар. Олор истэригэр салайааччылар, культура, библиотека, музей үлэһиттэрэ, учууталлар, иитээччилэр, ветераннар, пенсионердар.
Түһүлгэ кыттыылаахтара 3 бөлөххө арахсан, «Төрөөбүт төрүт тылбыт – сайдар төлкөбүт» диэн проект оҥорон көмүскээтилэр.
Саха тылын сайдарыгар үлэлэһэр «Кэскил түһэ» түмсүү салайааччыта, улуус баһылыгын таһымыгар тэриллибит тыл сэбиэтин чилиэнэ Светлана Михайловна Бурцева, «Уһуктуу» литературнай түмсүү салайааччыта Галина Владимировна Аммосова общественнай түмсүүлэр үлэлэрин билиһиннэрдилэр.
Улуус айар-суруйар куттаах дьонун айымньыларын көрдөрөр быыстапканы билистилэр. Түһүлгэ кыттыылаахтарыгар киин библиотека оҥорбут тургутуга ыытыллан, түмүгүн библиотекарь Сардаана Михайловна Черакшина билиһиннэрдэ. Саха тылын, литературатын уонна культуратын учууталлларын 2-с өрөспүүбүлүкэтээҕи сиеһин дэлэгээттэрэ Надежда Дмитриевна Васильева — Мүрү 2-с нүөмэрдээх оскуола, Елена Ивановна Атласова — Тулуна, Анна Борисовна Колосова — Бэйдиҥэ, Аксиния Ивановна Копырина -Суотту орто оскуолаларын саха тылын уонна литературатын учууталлара съезд үлэтин түмүгүн билиһиннэрдилэр.
4 түһүлгэ үлэтин түмүгүнэн маннык этиилэри киллэрэбит:
1. Олоҥхо педагогикатын уһуйааннарга, оскуолаларга киллэрии
2. Улууска, Республикаҕа биллэр «Кылыһах» образцовай коллектив салайааччыта Вера Анатольевна Троева үлэтин киэҥник тарҕатарга.
3. Найахылыы, Баатаҕайдыы оһуохайы киэҥник үөрэтэн тарҕатыы
4. Тэрилтэлэргэ, маҕаһыыннарга, уулуссаларга сахалыы эйгэ үөскээһинигэр былааннаах үлэни ыытыы (холобур: көстүүлээх сирдэргэ сахалыы кынаттаах тыллары ыйааһын)
5. Тэрилтэлэр сахалыы ааттаах буолууларын ситиһии
6. Олохтоох «Дуораан »радионан саха тылын харыстыырга сайыннарарга аналлаах анал биэриилэри таһаарыы
7. Улуус суруйааччыларын, олохтоох автордар айымньыларын киэҥник тарҕатыы, дорҕоонноох ааҕыылары тэрийии
8. Саха тылын учууталлара ханнык айымньылары ааҕар испииһэктэрин сааһынан арааран оҥороллоругар
9. Олохтоох Мүрү саһарҕата хаһыаты хас ыал, тэрилтэ барыта суруттаралларын ситиһии
10. «100 сахалыы сон» бырайыагы салгыы сайыннарыы
