МБУ "Усть-Алданское управление культуры" Кулун тутар 29 күнүгэр сылын ахсын ыытыллар «Олоҥхо дойдутун оҕотобун» бэстибээл үбүлүөйдээх 25 сылын үөрүүлээх быһыыга майгыга бэлиэтэннэ. Бу бэстибээлтэн кынаттанан, төрүттэрин удьуордаан ыччаттарбыт Олоҥхо эйгэтигэр айа-тута сылдьаллар, үгүс оҕо олоҥхону сөбүлээн үөрэтэр, толорор, араас түһүлгэлэргэ ситиһиилээхтик кытталлар. Кинилэр ситиһиилэригэр тирэҕирэн уһуйааччыларбыт айымньылаахтык үлэлииллэр. Киэн тутта ааттыыбыт – бэстибээл саҕаланыаҕыттан күн бүгүҥҥэ диэри оҕолору кытыннаран, онтон уһуйбут оҕолорун уһуйуллааччыларыгар сүбэ-ама буолар ытыктыыр киһибитин, “Кылыһах” студия салайааччытын Вера Иннокентьевна Троеваны, сүрэҕин баҕатынан элбэх оҕону, уһуйааччыны олоҥхо эйгэтигэр киллэрэн сирдии сылдьар киһибитин, “Кулуһун” бөлөх салайааччытын Зинаида Петровна Лугинованы, улуус олоҥхону толорооччуларын түмүүгэ, сайыннарыыга үлэлэһэ сылдьар, эдэр кэскиллээх үлэһиппитин Антонина Анатольевна Артамонованы, улуус Олоҥхо Ассоциациятын ыытар үлэтигэр сүбэ-ама, күүс-көмө буолар, элбэҕи эрэннэрэр тахсыылаах ыччаппыт Зоя Андреевна Стрекаловскаяны.
«Олоҥхо дойдутун оҕотобун» бэстибээл үөрүүлээх арыллыытыгар биһиги оҕолорбут Ваня Колодезников (Лөгөй), Клава Гуляева (Уһун Күөл) олоҥхону толорууларынан саҕаланна. Бэстибээл төрүттээччилэригэр, тэрийээччилэригэр Уус Алдан Олоҥхо Ассоциациятын, уһуйааччыларын ааттарыттан эҕэрдэ тыл этилиннэ. Үс күннээх олоҥхо түһүлгэтигэр Баатаҕай, Лөгөй, Бороҕон, 2 Лөгөй, Дүпсүн, 1 Өспөх, Суотту нэһилиэктэриттэн олоҥхону толорор кэскиллээх ыччаттарбытыгар ситиһиини баҕарыаҕыҥ.
