Презентация книги «Уус Алдан спорда кэм кэрдииһигэр»

От ыйын 8 күнүгэр В.В.Никифоров-Күлүмнүүр аатынан Культура дыбарыаһыгар С.С. Васильев-Борогонскай аатынан киин библиотека ааҕар саалатыгар Уус Алдан физическай культураҕа уонна спортка историятын сырдатар «Уус Алдан спорда кэм кэрдииһигэр» кинигэ үөрүүлээх сүрэхтэниитэ үрдүк таһымнаахтык буолан ааста. Кинигэҕэ биир дойдулаахтарбыт улахан таһымнаах күрэхтэһиилэргэ кыттыылара, спорт салайааччылара, спорт биирдиилээн көрүҥнэринэн сайдан кэлбит чахчылара, улуус бастыҥ спортсменнара киирдилэр.
Кинигэ хомуйуутугар үлэлэстилэр Петр Семенович Павлов, Мария Коммунаровна Попова уонна Яков Семенович Сивцев.
Үөрүүлээх киэһэҕэ кинигэни хомуйан оҥорбут Петр Семенович Павлов, Яков Семенович Сивцев, «Мүрү саһарҕата» хаһыат кылаабынай редактора Наталья Гаврильевна Попова кинигэ туһунан сиһилии кэпсээтилэр. Бэйэлэрин эҕэрдэлэрин эттилэр Саха республикатын физическай культураҕа уонна спортка министрэ Леонид Николаевич Спиридонов, Уус Алдан улууһун баһылыгын солбуйааччы Михаил Васильевич Борисов. «Мүрү саһарҕата» хаһыат кылаабынай редакторыгар Наталья Поповаҕа Саха республикатын физическай культураҕа уонна спортка министерствотын Махтал суруга, Петр Павловка, Мария Поповаҕа уонна Яков Сивцевка улуус баһылыгын Махтал суруктара туттарылыннылар. Маны таһынан «Саха Республикатын физическай культураҕа уонна спортка бэтэрээнэ» знак Николай Михайлович Гуляевка уонна Алексей Николаевич Окоемовка туттарылынна.
Кинигэ тула санаа үллэһиннилэр спорт ветераннара Василий Васильевич Румянцев, Анна Прокопьевна Бурнашева. Мустубут дьону ылбаҕай ырыанан эҕэрдэлээтэ Мария Андросова.
Кинигэни хомуйан оҥорбут үтүө –мааны дьоммутун чугас дьонноро, коллегалара эҕэрдэлээтилэр. Ол курдук эҕэрдэ тыла эттилэр Лена Семеновна Павлова, Мария Константиновна Павлова, Зинаида Николаевна Фомина, Светлана Семеновна Сивцева, Февронья Гаврильевна Федорова.

Пресс-центр культурных мероприятий VIII Спортивных игр народов Республики Саха (Якутия)