Норуот тылынан уус-уран айымньытын тарҕатар сыаллаах «ААРТЫКТАРЫНАН АЙАН» суола улууспут нэһилиэктэринэн айанын суола саҕаланна.

      Ол курдук, «Түһүлгэлээн түмсэбит, төлкөбүтүн түстүүбүт!»  олоҥхоһут Прокопий Наумович Соловьев – Намыын төрөөбүтэ 125 сылыгар аналаах улуустааҕы ОЛОҤХО ЫҺЫАҔЫН көрсө, хороҕор муостааҕы холбооттообут, сыспай сиэллээҕи сыһыппыт Улуу Хоро сириттэн, уус-уран самодеятельность, сцена, үлэ бэтэрээнэ, “Уус-Алдан улууһун култууратын сайдыытыгар киллэрбит кылаатын иһин” анал Бэлиэ хаһаайына, Улуу Хоро сыдьаана, олоҥхону толорооччу Афанасий Петрович Бурцев айаҥҥа турунна. Кинини ыраах айаҥҥа атаарыы, улуустааҕы култуура управлениетын көҕүлээһининэн, ыам ыйын 27 күнүгэр күнүс 11 чаастан офиснай кииҥҥэ Уус Кыһатыгар ыытылынна. Афанасий Петровичка алгыс тылларын анаатылар улуустааҕы Олоҥхо Ассоциациятын солбуйар председателлэрэ, улуустааҕы култуура уонна үөрэх салааларын начальниктара И.И. Аммосов, И.М. Тарская, улуустааҕы Бэтэрээн Сэбиэтин председателэ И.С.Калининскай уонна М.Е.Фомина. “Саха киһитэ ыраах айаҥҥа быһахтаах сылдьыахтаах” — диэн этэн туран Бэрт-Ууһун уустарын түмсүүтүн аатыттан тимир уустара Илларион Попов, Афанасий Шепелев олоҥхону толорооччу А.П.Бурцевка сахалыы быһах уонна кылынан өрүллүбүт кур бэлэхтээтилэр.

    Өбүгэбит төрүт айанын сөргүтэн, оҕус көлөнөн айаннаабыт ыырдарын, оһон хаалбыт ыллыктарын тэлэн, аартыктарын арчылаан, төрүт үгэһи сөргүтэн, саха миинэр миҥэтэ, көлүнэр көлөтө оҕуһунан айаннатан, олоҥхону толорооччу Афанасий Петрович – Бөскөй Бөҕө  бүгүн ыам ыйын 27 күнүгэр Тулунаҕа тиийиэҕэ. Салгыы Өнөрүнэн, Остуойканан, Дүпсүнүнэн, Бээдинэн, Уһун-Күөлүнэн, Кэптэнинэн айаннаан, хонон-өрөөн, олоҥхолоон бэс ыйын 7-8 күннэригэр Баатаҕай бөһүөлэгэр ыытыллар Олоҥхо ыһыаҕар тиийэн кыттыыны ылыаҕа.

       Өбүгэ саҕаттан илдьэ кэлбит уус-уран баайбытын – олоҥхобут сүөгэйин – сүмэтин сүтэрбэккэ, өссө үрдүк таһымҥа таһаарар туһугар улууспут талааннаах дьоно дьоҥҥо – сэргэҕэ билиһиннэрэн ылсан үлэлииллэрэ хайҕаллаах дьыала. Бу айаныгар Афанасий Петрович биир дойдулаахпыт С.С.Васильев – Борогонскай “Эрчимэн Бэргэн”  олоҥхотун олоҥхолоон доллоһутуо, оһуохайдаан да ойуо. Норуот уус-уран айымньытын  толорууну сайыннарар, тарҕатар, эйгэни тэрийэр сыаллаах-соруктаах айанныыр Ытык киһини, ыччат дьоммут, олоҥхону сэҥээрээччи дьон-сэргэ, улууспут олохтоохторо, нэһилиэк аайы сэргии көрүөхтэрэ, истиэхтэрэ диэн эрэнэбит.

[meta_gallery_slider id=»2442″]

error: МБУ \"Усть-Алданское управление культуры\"