«Мин дьону туойабын» кинигэ сүрэхтэниитэ

Кулун тутар 10 күнүгэр Дьокуускай куоракка Национальнай библиотека историческай саалатыгар биир дойдулаахпыт Полина Находкина — Полина Победа «Мин дьону туойабын» кинигэтин сүрэхтэниитэ буолла. Полина Пантелеймоновна бу күһүн Үөһээ Бүлүү улууһугар Саха норуодунай поэта Петр Тобуруокап төрөөбүтэ 105 сылыгар «Тобуруокап көмүс күһүнэ» VII өрөспүүбүлүкэтээҕи тэрээһиҥҥэ хоһоон күрэҕэр улуустааҕы «Уһуктуу» айар куттаахтар түмсүүлэрин аатыттан кыттыбыта. Бу биллэриллибит көҥүл күрэххэ 20 улуустан киирсибиттэриттэн Полина Победа кыайыылаах үрдүк аатын ылан «Дани-алмас» хампаанньа (ген.директор Дария Скобелева) кинигэ кыһатыгар Саха АССР тэриллибитэ 100 сылынан 100 кинигэни босхо бэчээттэтэр сертификатынан наҕараадаламмыта. Ол кинигэтин сүрэхтэниитин «Тэтим»саха араадьыйатын үлэһиттэрэ тэрийэн ыыттылар.
Сүрэхтэнии түһүлгэтигэр ааптар республикабыт, улууспут 100 биллиилээх дьонугар анабыл хоһоонноруттан билиҥҥи сахалыы саҥарар араадьыйабыт көмүс куоластаахтара-Саха Өрөспүүбүлүкэтин үтүөлээх артыыһа Кирилл Семенов уонна сөбүлүүр дикторбыт Эдуард Рудых ааҕан иһитиннэрдилэр. Араадьыйа кэскиллэрэ Аскалон Семенов уонна Роман Алексеев ылбаҕай ырыаларын бэлэхтээтилэр. Биһиги улууспутуттан култуура үлэһиттэрин идэлээх сойууһун кэмитиэтин бэрэссэдээтэлэ, «Уһуктуу» түмсүү салайааччыта Галина Аммосова улуус култууратын управлениетын (нач.Иннокентий Аммосов) аатыттан эҕэрдэ суругу уонна «Уус Алдан култууратын сайдыытыгар кылаатын иһин» анал бэлиэни туттарда. Маны таһынан С.Васильев-Борогонскай аатынан улуустааҕы киин библиотека үлэһиттэрэ, «Уһуктуу» түмсүү кыттыылаахтара кини «Кэнчээри» ансаамбыл 50 сылынан Василий Парниковка уонна библиотекаҕа анаан суруйбут хоһооннорун мустубут дьоҥҥо ааҕан иһитиннэрдилэр. Тэрээһиҥҥэ кыттыыны ыллылар анабыл хоһоон дьоруойдара, араас идэлээх, дьарыктаах саха дьоно: «Ил Түмэн» дьокутаата Феодосия Габышева, норуодунай суруйааччы Наталья Михалева-Сайа, поэт Саргылана Гольдерова-Саргы Куо, Саха НКИХ биллэр ыытааччыта Георгий Белоусов, суруналыыс Татьяна Маркова уонна Омскайдааҕы доҕотторо, Уус Алдантан аймахтара, Кэбээйиттэн бииргэ үөрэммит оҕолоро, Дьокуускайтан, Өймөкөөнтөн, Орто Халыматтан бииргэ үлэлээбит, алтыспыт дьоно, биир дойдулаахтара. Дэгиттэр дьоҕурдаах биир дойдулаахпытыгар, Кыайыы кыыһыгар Полина Находкинаҕа-Полина Победаҕа айар аартыга арыллан иһэригэр, ситиһии сиэттиһэригэр, кыайыынан кынаттанарыгар, чэгиэн туруктаах этэҥҥэ сылдьарыгар, өссө да сахатын дьонун үөрдэ турарыгар баҕарабыт!