“Куйуур олоҥхото” бэстибээл Д.М. Говоров-Олоҥхоһут Миитэрэй төрөөбүтэ 175 сылынан үөрүүлээх быһыыга-майгыга Өлтөх сиригэр арылынна

??? Өрөспүүбүлүкэҕэ эдэр ыччакка олоҕурбут үгэһинэн олоҥхолооһуну көҕүлүүр “Куйуур олоҥхото” бэстибээл Д.М. Говоров-Олоҥхоһут Миитэрэй төрөөбүтэ 175 сылынан үөрүүлээх быһыыга-майгыга Өлтөх сиригэр арылынна.

Икки күннээх бэстибээлгэ Мэҥэ-Хаҥалас, Нам, Үөһээ Бүлүү, Таатта, Уус-Алдан, Амма, Бүлүү улуустарын 7 бастыҥ олоҥхону толорор ыччата күөн күрэстэрэ саҕаланна.

⚜️Дьүүллүүр сүбэ:
— Хотугулуу илиҥҥи федеральнай университет профессора, «Куйуур Олоҥхото» өрөспүүбүлүкэтээҕи бэстибээл ааптара Галина Семеновна Попова — Санаайа;
— Саха Өрөспүүбүлүкэтин «Олоҥхо Ассоциацията» общественнай тэрилтэ вице-президена, олоҥхо киинин сүрүннүүр специалиһа Елена Николаевна Протодьяконова;
— Олоҥхо киинин научнай-методическай уонна тас сибээскэ үлэ специалиһа — Флегонтова Ульяна Михайловна;
— Мэҥэ-Хаҥалас улууһун Аркадий Алексеев аатынан культура дьиэтин уус-уран салайааччыта, 2016,2021 сыллаах өрөспүүбүлүкэтээҕи олоҥхо ыһыаҕын муҥутуур кыайыылааҕа — Никифоров Виталий Витальевич;
— Уус-Алдан улууһун Олоҥхо дьиэтин директора Айаал Гаврильевич Аргунов.
Бэстибээл маҥнайгы күнүгэр Өлтөх нэһилиэгин Тататы алааһын Эбэтигэр сиэр-туом толоруллан, алгыс түһэрэн куйуурдааһын тэрилиннэ. Ону тэҥэ нэһилиэк олохтоохторугар уонна ыалдьыттарыгар чэбдик салгыҥҥа спортивнай күрэхтэр ыытылыннылар.
Бэстибээл иккис күнүгэр олоҥхоһут Миитэрэй сыдьаана Георгий Георгиевич Говоров нэһилиэнньэҕэ сахалыы булт тэрилин оҥоруу, хайдах сөптөөхтүк булт тэрилин туруоруу туһунан маастар кылаас ыытыаҕа. Ону таһынан Нам улууһун “Түөлбэ” оҕо киинин фольклор куруһуогун педагога, импровизатор-хомусчут, “Муус устар” эдэр ыччат фестивалын чэрчитинэн ыытыллыбыт “Хомус тэтимэ” күрэс финалиһа Сахаайа Колодезникова нэһилиэк оҕотугар-ыччатыгар хомуска маастар кылаас биэриэҕэ. Икки күннээх олоҥхону толорон илин-кэлин түсүһүү түмүгэ сарсын үөрүүлээх-быһыыга майгыга биллиэҕэ.