МБУ "Усть-Алданское управление культуры" Кулун тутар 17 күнүгэр улуус культуратын ветераннарын общественнай түмсүүтүн (сал. Копырина М.А.) көҕүлээһининэн, саҥа сырдык, аныгылыы ис киирбэх оҥоһуулаах В.В.Никифоров-Күлүмнүүр аатынан Культура дыбарыаһыгар ахтылҕан аргыстаах, үөрүү-көтүү үктэллээх, ырыа-тойук аргыстаах истиҥ көрсүһүү тэрилиннэ. Бу күн өр сылларга бииргэ алтыһан үлэлээбит биир идэлээхтэр мустан урукку кэмнэри санастылар, бииргэ үлэлээн ааспыт дьоннорун ахтан – санаан аастылар. Киэһэтин «Ааспыты санаһан, саҥаны уруйдаан» концеры культура ветераннара көрөөччүлэригэр бэлэх быһыытынан ууннулар. Улуус культуратын ветераннара кыттыһан саҥа Культура дыбарыаһа сибэккинэн симэннин, дьон-сэргэ сөбулээн, таптаан сылдьар, сынньанар сирэ буоллун диэн Сибэкки оранжереята ылыналларыгар харчынан бэлэхтэрин Культура дыбарыаһын директорыгар Гоголев М.П. уонна аны сайын биһиги улууспутугар ыытыллар Саха Өрөспүүбүлүкэтин 8-с Спортивнай оонньууларын фондатыгар концертан киирбит харчыны улуус баһылыгын солбуйааччытыгар, Дирекция салайааччытыгар Сивцев П.С. туттардылар. Улуус культураҕа управлениетын солбуйар начальнига Л.С.Павлова улуус, республика культуратын сайдыытыгар бэйэлэрин сүҥкэн кылааттарын киллэрбит дьоммутугар Мурукова К.В. «За вклад в развитие народного художественного творчества РС(Я)», Копырина М.А. «За вклад в развитие культуры Усть-Алданского улуса» анал бэлиэлэри ытыс тыаһын ортотугар үөрүүлээх быһыыга туттарда. Уус-Алдан улууһун норуотун маастара, культура ветерана П.С.Нафанаилов бэйэтэ чочуйан оҥорбут В.В.Никифоров-Күлүмнүүр мэтириэттээх Чороону уонна кытыйаны бэлэх быһыытынан уунна. Бу күн культура ветераннара ким концертка кыттан, ким көрөөччү буолан, инникигэ эрэллээх, айар-тутар баҕалаах тарҕастылар.