“Доҕотторбут ортотугар” Саҥа Дьыллааҕы көрсүһүү тэрилиннэ

Саха Автономията төрүттэммитэ 100 сылынан, Саха Республикатыгар Ийэ сылынан, Аан дойдутааҕы инбэлииттэр күннэринэн Уус Алдан улууһугар “Олоххо дьулуурбут – угуйар күүс буолуохтун” Декада чэрчитинэн, бүгүн “Олоҥхо Дьиэтэ” этнокультурнай кииҥҥэ Уус Алдан улууһун доруобуйаларынан хааччахтаах дьон общественнай түмсүүтэ
“Доҕотторбут ортотугар” Саҥа Дьыллааҕы көрсүһүү тэрилиннэ.

Тэрээһин Тымныы Моруос оҕонньор, Хаарчаналыын эҕэрдэтиттэн саҕаланна. Кэлбит түмсүү кыттыылаахтарын Уус Алдан улууһун дьаһалтатын аппаратын салайааччыта Мария Петровна Заболоцкая, Уус Алдан улууһун общественнай түмсүүлэрин координационнай Сэбиэтин салайаааччыта Лена Семеновна Павлова, Уус Алдан улууһун инбэлииттэрин обществотын председателя Елизавета Николаевна Васильева эҕэрдэлээтилэр, түмсүү үлэтигэр көхтөөхтүк кыттар, ситиһиилээх дьоннорбутун бэлиэтээтилэр.

Ийэ сылынан ,,Күн-күбэй Ийэ олоххо күүһэ” конкурс түмүгэ таҕыста. Манна 1 миэстэни Өнөрөн – Долгууна Кардашевская, 2 миэстэни Ирина Лыткина –Өнөр, 3 миэстэни – Лена Сивцева –Өлтөх ылары ситистилэр. Саҥа дьыллааҕы остуол сервировкатыгар күрэс ыытылынна, маассабай оонньуулары оонньоттулар, ырыанан – үҥкүүнэн эҕэрдэлэстилэр, тэрээһин түмүгүнэн “Король, Королева бала” диэн анал ааттары Спиридон Крылов –Хоро уонна Евдокия Гоголева – Баатаҕай ыллылар, бэйэ-бэйэҕэ бырааһынньыктааҕы бэлэхтэри туттарсан үөрэн-көтөн тарҕастылар.