«Быйаман быйаҥнаах сааһа» быыстапка үөрүүлээх арыллыыта ыытылынна

Бүгүн ахсынньы 1 күнүгэр Уус Алданнааҕы историяны уонна кыраайы үөрэтэр түмэл быыстапкалыыр саалатыгар, Саха Республикатын уус-уран оҥоһуктарга маастара, Уус Алдан улууһун норуотун маастара, хомус ууһа Петр Дмитриевич Куличкин – Быйаман Уус төрөөбүтэ 65 уонна айар үлэтин 10 сылыгар анаммыт “Быйаман быйаҥнаах сааһа” быыстапка үөрүүлээх арыллыыта ыытылынна.

Быыстапка үөрүүлээх арыллыытыгар бэйэлэрин эҕэрдэлэрин тиэртилэр “Уус Алдан улууһа (оройуона)” муниципальнай оройуон Сэбиэтин бэрэссэдээтэлэ И.И. Колодезников, улуустааҕы культура управлениетын начальнига И.И. Аммосов, Мүрү нэһилиэгин депутаттарын Сэбиэтин бэрэссэдээтэлэ О.Ф. Федоров, Хомус аан дойдутааҕы киинин уонна түмэлин директорын солбуйааччы Н.И. Ефремов, музей быыстапкалыыр салаатын сэбиэдиссэйэ Т.А. Жиркова, культура управлениетын солбуйар начальнига, улуустааҕы “Хомус” общественнай түмсүү салайааччыта Л.С.Павлова, түмэл директора Дь.М.Заболоцкай, Өнөр нэһилиэгиттэн “Тускул” культура киинин директора И.М.Лукачевскай, Мүрүттэн СР норуотун маастара М.С.Атласова, Баатаҕайтан СР уус уран оҥоһуктарга маастара Л.И.Данилова.

Быйаман Уус айар быыстапкатын аһыллыытынан хохуоралаах тыллаах, хоҥкунас тыастаах хомус дьүрүскэн тыаһынан эҕэрдэлээтилэр, сэтинньи 27 күнүгэр Мэҥэ-Хаҥалас улууһун Майа сэлиэнньэтигэр ыытыллыбыт “OlonkhoFest” “NeoOlonkho-2022” өрөспүүбүлүкэтээҕи ыччат фестивалыгар “Төрүт дорҕоон” күрэҕин Кылаан чыпчаал хаһаайына Федот Винокуров, “Хомус” түмсүү чилиэнэ Дьулустан Заболоцкай. Ылбаҕай ырыаларын анаатылар улууспут маанылаах куоластара Анна Лукачевская-Макарова, Планида Бурцева.

Бу күн хомус ууһа Петр Дмитриевич-Быйаман Ууска “Мүрү нэһилиэгин бочуоттаах олохтооҕо” үрдүк аат иҥэрилиннэ, Саха Өрөспүүбүлүкэтин Ил Түмэн бастайааннай комитетын, Уус Алдан улууһун депутаттарын Сэбиэтин Бочуотунай грамоталара, культура управлениетын, “Хомус” общественнай түмсүү, Сэһэн Ардьакыап аатынан улуус түмэлин  Эҕэрдэ суруктара, сэмэй бэлэхтэрэ туттарылынна.

СР уус уран оҥоһуктарга маастара, Уус Алдан улууһун норуотун маастара, Мүрү нэһилиэгин бочуоттаах олохтооҕо Петр Дмитриевич Куличкин-Быйаман Уус “Быйаман быйаҥнаах сааһа” айар быыстапката ахсынньы 12 күнүгэр дылы улуус түмэлин быыстапкалыыр саалатыгар туруоҕа. Улууспут олохтоохторун, ыалдьыттарын сэргэх, сонун быыстапканы кэлэн сэргии, кэрэхсии көрөргүтүгэр ыҥырабыт.