«Сомоҕо күүһүнэн – Кыайыыны уһансан!» акция

Муус устар 30 күнүгэр, сарсыарда 10 чаастан, улуустааҕы үөрэх уонна култуура управлениеларын офиснай киинин улахан мунньахтыыр саалатыгар,  өрөспүүбүлүкэҕэ биллэриллибит Сомоҕолоһуу, улууспутугар биллэриллибит Геройдар сылларыгар уонна Улуу Кыайыы 75 сылын көрсө, улуус баһылыгын 1 солбуйааччы П.И. Попов муус устар 25 күнүнээҕи 267 №-дээх дьаһалыгар олоҕуран, Улуу Кыайыы 75 сылын көрсө «Сомоҕо күүһүнэн – Кыайыыны уһансан!» акция ыытылынна.

2014 сыл ыам ыйын 27 күнүгэр улуус дьаһалтатын улахан саалатыгар Кыайыы 70 сылын көрсө Сэрии уонна үлэ ветераннарын Фондатыгар үбү киллэрэр сыалтан бастакы акция ыытыллыбыта. Ветераннарга социальнай өйөбүлү, материальнай көмөнү оҥоруу, улууска, нэһилиэктэргэ баар памятниктары саҥардыы, өрөмүөннээһин, тупсаран оҥоруу, саҥа өйдөбүнньүк бэлиэлэри, сквердэри тутуу, ветераннары үйэтитии, сэрии сылларын тустарынан өйдөбүнньүк бэчээт бородууксуйаларын оҥоруу, ветераннар Сэбиэттэрэ ыытар тэрээһиннэрин үбүлүүр сыаллаах соруктаах акция ыытыллан, киирбит үп-харчы фонда Устаабыгар олоҕуран, анал сыалыгар туһаныллыбыта.

Бүгүҥҥү акцияҕа эҕэрдэ тылларын эттилэр улуус баһылыгын I солбуйааччы Петр Иванович Попов, улуус депутаттарын Сэбиэтин бэрэссэдээтэлэ Иван Иванович Колодезников, улуустааҕы бэтэрээннэр Сэбиэттэрин бэрэссэдээтэлэ Иван Семенович Калининскай, улуустааҕы социальнай көмүскэл управлениетын начальнига Анатолий Дмитриевич Сторожев, Мүрү нэһилиэгин баһылыга Василий Иванович Аммосов.

Быйылгы акция тэрээһиҥҥэ ыҥырыылаах ыалдьыт быһыытынан кыттыыны ыллылар Мүрү нэһилиэгин тыыл бэтэрээннэрэ, сэрии кэмин оҕолоро. Мүрү нэһилиэгин бэтэрээннэрин ааттарыттан Екатерина Иннокентьевна Неустроева, быйыл 25 сылын үлэлии олорор “Сэһэргээ, эн, үөлээннээҕим” түмсүү аатыттан Интерна Алексеевна Слепцова бэйэлэрин саастыылаахтарыгар кэлэн иһэр Маай бырааһынньыктарынан эҕэрдэлэрин эттилэр. Ылбаҕай ырыаларын бэлэхтээтилэр сцена, үлэ бэтэрээннэрэ, кэхтибэт талааннар Розалия Михайловна Окоемова, Лидия Даниловна Пестрякова.

Ытыктыыр, убаастыыр бэтэрээннэрбитигэр бэйэлэрин ырыаларын тойуктарын анаатылар улууспут бастыҥ ырыаһыттара Семен Орлов, Василий Охлопков, Евдокия Васильева, кэлэр көлүөнэ аатыттан хомус кутуллар дорҕоонун бэлэхтээтилэр Мүрү 2 №–дээх орто оскуолатын 5 “а” кылааһын кэрэчээн кыргыттарын хомусчуттарын бөлөҕө (сал. Крылова Маргарита Ивановна).

Бүгүн ыытыллыбыт «Сомоҕо күүһүнэн – Кыайыыны уһансан!» акцияҕа барыта 48 тэрилтэлэр, общественнай түмсүүлэр кыттыыны ыллылар. Барыта 554780,00 ол иһигэр уу харчынан 277650, гарантийнай суругунан 287130 солкуобай киирдэ.

Счетнай хамыыһыйаҕа үлэлээтилэр:

  1. Стручкова Елена Ивановна – улуустааҕы культура управлениетын бухгалтера, счетнай хамыыһыйа бэрэссэдээтэлэ;
  2. Фомина Мария Егоровна – улуустааҕы бэтэрээннэр Сэбиэттэрин бэрэссэдээтэлин солбуйааччы, чилиэн;
  3. Давыдова Күннэй Руслановна – улуустааҕы социальнай көмүскэл управлениетын кылаабынай бухгалтера, чилиэн;

Түмүккэ акция тэрийэр хамыыһыйатын аатыттан улуустааҕы култуура управлениетын начальнигын солбуйааччы Лена Семеновна Павлова кыттыбыт дьоҥҥо, тэрилтэлэргэ махталын, бэтэрээннэргэ кытаанах доруобуйаны баҕаран тыл эттэ.

Күндү улууспут олохтоохторо! «Сомоҕо күүһүнэн — Кыайыыны уһансан!» акция салҕанан барар. Көмө харчыгытын улуустааҕы култуура управлениетын бухгалтериятыгар тиксэрэргитигэр.

Анна Федорова,

улуустааҕы култуура управлениетын кылаабынай специалиһа.

error: МБУ \"Усть-Алданское управление культуры\"