«КЫРАДАҺЫН ЭЙГЭТЭ – КЭРЭ ИИС КУСТУГА» аһаҕас өрөспүүбүлүкэтээҕи быыстапка күөн – күрэс.

Норуот ойуулуур-дьүһүннүүр искусствотыгар сахалыы төрүт иис – кырадаһынтан аттаран кыбытыылаах тигии дьоһун миэстэни ылар. Ол курдук, өрөспүүбүлүкэ бары улуустарыгар, үгүс нэһилиэктэригэр айымньылаахтык үлэлиир, араас таһымнаах көрүүлэргэ ситиһиилээхтик кыттар айар түмсүүлэр, биирдиилээн иистэнньэҥнэр Сахабыт сирин бары муннуктарыгар кэрэттэн кэрэ үлэлэрин дьон-сэргэ көрүүтүгэр таһаараллар.

Кыбытан тигии маастара,  тарбаҕар талааннаах  СР норуотун маастара, Уус-Алдан улууһун бочуоттаах олохтооҕо, улуустааҕы “Мындыр”, Мүрү нэһилиэгин  “Алаас хотуна” общественнай түмсүүлэр Ытык Сүбэлэрин  чилиэнэ Атласова Мария Семеновна – Иис Маарыйа бырайыагынан  «Кырадаһын эйгэтэ – кэрэ иис кустуга» өрөспүүбүлүктээҕи быыстапка – көрүү ыам ыйын 31 – бэс ыйын 1 күннэригэр улууспут киинигэр Бороҕоҥҥо ыытылынна.

М.С.Атласова — Иис Маарыйа 65 сааһынан тус бырайыагынан ыытыллар “Кырадаһын эйгэтэ – кэрэ иис кустуга” аһаҕас өрөспүүбүлүкэтээҕи быыстапка күөн — күрэскэ норуот билиниитин ылбыт маастардар, талааннаах иистэнньэҥнэр, саҥа саҕалааччылар, оскуола үөрэнээччититтэн саҕалаан аҕам сааһыгар үктэммит далбар хотунугар тиийэ, барыта 29 биирдиилээн, 9 түмсүүлэр Кэбээйи, Абый, Таатта, Хаҥалас, Үөһээ-Бүлүү, Сунтаар улуустарыттан, Дьокуускай куораттан уонна бэйэбит улууспут нэһилиэктэриттэн, кэлин 2 сылга тикпит бастыҥ үлэлэринэн кытыннылар.

Бу күөн – күрэс саха норуотун төрүт ииһин тутуһан кырадаһынтан аттаран, ойо быһан, кыбытыылаах тигиини киэҥ эйгэҕэ тарҕатар, өбүгэ төрүт үгэһин тутуһан иис таһымын үрдэтэр, саҥа дьарыктанааччылары иис алыбар сыһыарар, көҕүлүүр сыаллаах-соруктаах ыытылынна.

Ыам ыйын 31 күнүгэр, быыстапка үөрүүлээх аһыллыытыгар Галина Иванова – Айтыына  суруйуутугар  Мария Семеновна Атласова – Иис Маарыйа туһунан  олоҥхо тылынан дьүһүйүүнү  “Алаас Хотуна”  түмсүү далбар хотуттара толорон иһитиннэрдилэр. Улуус дьаһалтатын аатыттан Г.Г.Тимофеев, СӨ “Симэх” норуот искусствотын национальнай кииниттэн Д.К.Осипов, культура управлениетын аатыттан М.П.Гоголев, Мүрү нэһилиэгин баһылыгын солбуйааччы В.В.Колесова, 1 Хоро нэһилиэгин баһылыгын солбуйааччы В.В.Гуляев, “Алаас Хотуна”, “Мындыр”, Найахыттан “Симэх”, Лөгөйтөн “Аал уот”  түмсүүлэр, аймахтара Мария Семеновна 65 сааһынан бастыҥ баҕа санааларын, эҕэрдэ тылларын, ылбаҕай ырыанан эҕэрдэлэрин Найахыттан “Симэх” түмсүү далбар хотуттара, улууспут бастыҥ ырыаһыта Данил Бурцев, эдэр ырыаһыт Саина Обутова анаатылар.

Саха Республикатын норуотун маастара, Россия үөрэҕириитин туйгуна, Россия уопсай үөрэхтээһин Бочуоттаах үлэһитэ, Саха Республикатын култууратын туйгуна, Россия худуоһунньуктарын сойууһун чилиэнэ, Российскай Федерация Бырабыыталыстыбатын, «Душа России» бириэмийэ лауреата Ольга Ивановна Гуляева салайааччылаах өрөспүүбүлүкэбит бастыҥ иистэнньэҥнэрэ “ЭТНО-ЭРАТО”  аан дойдутааҕы конкурска 3 миэстэни ылбыт үлэлэрин сахалыы кыбытык тигиилээх сэлиэччиктэрин,  Саха Республикатын норуотун маастара, “Лоскутная мозаика России”  Бүтүн Россиятааҕы фестиваль лауреата Людмила Петровна Жиркова бэйэтэ уонна кини салайар түмсүүтүн чилиэннэрэ тикпит, күн көмүс утаҕын санатар оҕуруо тиһигин дьиктитик дьүөрэлээн, күлүмүрдүү оонньотон, саха омук мааныга кэтэр таҥаһыгар, туттар араас тэриллэригэр тиспит оҕуруо симэхтээх үлэлэрин Мүрү 1, 2 №-дээх оскуолаларын кыргыттара кэтэн, хааман көрдөрдүлэр.

Салгыы быыстапка кыттыылаахтарыгар, көрөөччүлэргэ анаан О.И.Гуляева, Л.П.Жиркова, Лоскутная мозаика Якутии конкурс быйылгы кыайыылааҕа Тааттаттан М.П. Федорова маастар-кылаастары биэрдилэр.

Үлэ ис хоһоонун, өҥү таба дьүөрэлээһинин, сиигин хаачыстыбатын, төрүт үгэһи тутуһан тигиитин, ойо быһыыны киллэриитин, кыбытыылаах тигиини сыаналаан «Кырадаһын эйгэтэ – кэрэ иис кустуга» өрөспүүбүлүктээҕи быыстапка – көрүү күрэх дьүүллүүр Сүбэтигэр үлэлээтилэр Дмитрий Константинович Осипов, СӨ “Симэх”  норуот искусствотын уонна уус-уран оҥоһуктарын национальнай киинин норуот уус-уран оҥоһуктарыгар салаатын салайааччыта, Ольга Ивановна Гуляева, Саха Республикатын норуотун маастара, Россия үөрэҕириитин туйгуна, Россия уопсай үөрэхтээһин Бочуоттаах үлэһитэ, Саха Республикатын култууратын туйгуна, Россия худуоһунньуктарын сойууһун чилиэнэ, Российскай Федерация Бырабыыталыстыбатын, «Душа России» бириэмийэ лауреата, Людмила Петровна Жиркова, Саха Республикатын норуотун маастара, “Лоскутная мозаика России”  Бүтүн Россиятааҕы фестиваль лауреата, Мария Семеновна Атласова,  Уус-Алдан улууһун, СӨ уус-уран оҥоһуктарга, СӨ норуотун маастара, Мүрү нэһилиэгин, Уус-Алдан улууһун бочуоттаах олохтооҕо, «Кырадаһын эйгэтэ – кэрэ иис кустуга» өрөспүүбүлүктээҕи быыстапка – көрүү күрэх ааптара, Дъячковская Альбина Семеновна,  СӨ уус-уран оҥоһуктарга норуотун маастара.

Көрүү-күрэх түмүгүнэн “Эдэр кэскиллээх иистэнньэҥ” — Лыткина Ирина Ивановна Өнөр нэһилиэгиттэн “Өҥ быйаҥнаах дойдубун, Өнөр сирин таптыыбын”, “Кэрэ оһуор, сиэдэрэй сиик” —  “Сиэдэрэй иис тумсуу”, сал. Иванова Айталина Петровна, Уус-Алдан, Өлтөх нэһилиэгин Арыылааҕыттан  “Төрүт дойдум – Өлтөх сирэ”, “Өҥ-дьүһүн дьүөрэтин бастыҥа” — Бурнашева Анна Афанасьевна, Уус-Алдан Мүрү нэһилиэгэ, “Иэйии”, “Кырадаһынтан аттаран кыбытыылаах тигии удьуор утума” — Охлопкова Галина Семеновна, Мүрү, “Уус-Алдан Гербэтэ”, “Ойуу-дьарҕаа сиик маастара” — Павлова Ирина Георгиевна, Үөһээ-Бүлүү, “Көбүөр”, “Атласова Мария Семеновна — Иис Маарыйа ньыматын утумнааччы” — Николаева Людмила Михайловна, Уус-Алдан, Баатаҕай, “Таптал аартыга”, “Кырадаһын умсулҕана” — Сивцева Альбина Дмитриевна, Уус-Алдан, Найахы, “Кырадаһын тойуга”, “Өбүгэ үгэһэ үйэлэргэ” — Сивцева Александра Афанасьевна, Уус-Алдан, Найахы, “Алааһым арылы кустуга”, “Алыптаах иис иэйиитэ” — Татаринова Надежда Михайловна, Хаҥалас Нөмүгүтүттэн “Саас“, “Оҕо саас оһуора” —  Давыдова Валерия, “Өркөн”  оҕону эбии үөрэхтээһин киинин уһуйуллааччыта, салайааччыта Саввинова И.М.,  “Көбүөр” үлэлэринэн анал аат хаһаайкаларынан буоллулар.

Көрүү-күрэх кыайыылаахтарынан “Тандам ытык томторо” үлэлэринэн Байаҕантай нэһилиэгиттэн “Дьүөгэлиилэр” түмсүү 1 миэстэни, “Кыайыы салюта” үлэтинэн Сунтаартан Федорова Розалия Иннокентьевна 2 миэстэни, Кэбээйиттэн “Оһуор тойуга” түмсүү, сал. Софронеева Елизавета Константиновна, “Бу Лена” диэн үлэлэринэн 3 миэстэни ылары ситистилэр. Онтон күөн-күрэс “Муҥутуур кыайыылааҕын” аатын Уус-Алдан Найахытын тарбаҕар талааннаах иистэнньэҥэ Федорова Мария Ивановна “Олох уйгута” диэн үлэтинэн ылары ситистэ.

Кыбытан тигии улахан маастардара, СӨ уус-уран оҥоһуктарга уонна норуот маастардара  Тааттаттан Федорова Мария Петровна, Сунтаартан Моякунова Христина Захаровна, Дьокуускай куораттан Евграфова Айталина Викторовна, Уус-Алдантан  Дегтярева Татьяна Гаврильевна бэйэлэрин бастыҥ үлэлэрин аҕалан быыстапкаҕа туруордулар.

Икки күннээх быыстапка, күөн-күрэс түмүгүнэн быыстапка кыттыылаахтара  иистэнньэҥнэр уопут атастаһыыларыгар, маастарыстыбалара үрдүүрүгэр кэмиттэн-кэмигэр араас таһымнаах быыстапкалар, СӨ норуотун маастардарыттан састааптаах көһө сылдьар үөрэтэр хайысхалаах семинардар ыытыллалларыгар, методическай көмө улуустарынан оҥоһулларыгар, сахалыы төрүт иис – кырадаһынтан аттаран кыбытыылаах тигии сайдарыгар, ыччаты төрүт иискэ сыһыарарга эбии үөрэхтээһин киинин иһинэн кырадаһынтан тигии куруһуоктара үлэлииллэригэр баҕа санааларын биллэрдилэр.

Анна Федорова, Уус-Алдан улууһун культураҕа управлениетын

норуот айымньытын сайыннарар отдел кылаабынай специалиһа.

error: МБУ \"Усть-Алданское управление культуры\"