«ААРТЫКТАРЫНАН АЙАН» суола улууспут нэһилиэктэринэн айанын суола салҕанар.

  Улуу Хоро сыдьаана, олоҥхону толорооччу Афанасий Петрович Бурцев – Бөскөй Бөҕө, ыам ыйын 27 күнүгэр Тулуна бөһүөлэгэр тиийдэ. Манна кинини 2-с Лөгөй нэһилиэгин бэтэрээннэрин Сэбиэтин председателэ Мария Иннокентьевна Дегтярева, Тулунатааҕы сынньалаҥ киин үлэһиттэрэ, нэһилиэк олохтоохторо, Тулуна орто оскуолатын кырачаан олоҥхону толорооччулара арыылаах алаадьынан, уохтаах кымыһынан айах тутан көрүстүлэр, олоҥхо иһиттилэр. Афанасий Петрович Тулуна бөһүөлэгэр хонон-өрөөн, оҕуһун аһатан, сынньатан баран, ыам ыйын 28 күнүгэр Харачааһынаан  Өнөргө айаннаан тиийдилэр. Манна эмиэ нэһилиэк бэтэрээннэрин Сэбиэтин председаателэ Любовь Дмитриевна Борисова, култуура үлэһиттэрэ, нэһилиэк олохтоохторо, былыргылыы алаастартан курдук хомуллан, ол эбэтэр түөлбэлэртэн түмсэн,  барыта оҕолуун-уруулуун, улахан дьоннуун 70–ча буолан олоҥхону толорооччуну көрүстүлэр. Сахалыы сиэринэн айах туттулар, оллоонноон олорон олоҥхо иһиттилэр. Оскуола оҕолоро Афанасий Петровичка бэйэлэрин талааннарын көрдөрөн тойуктаан иһитиннэрдилэр. Норуот тылынан уус-уран айымньытын олоҥхону тарҕата сылдьар Афанасий Петровичка махтанан туран нэһилиэк тэрилтэлэрин, общественноһын ааттарыттан Махтал суруктары туттардылар. Салгыы Россия Геройа М.М.Стрекаловскай аатынан музейга сырытыннардылар.

  Бүгүн, ыам ыйын 29 күнүгэр, олоҥхону толорооччу Афанасий Петрович – Бөскөй Бөҕө Дүпсүн нэһилиэгэр айаннаата. Кинини Өнөр нэһилиэгиттэн алаастарынан айанныырыгар Егор Гаврильевич Шелковников сирдьитинэн барыста.

  Өбүгэбит төрүт айанын сөргүтэн, оҕус көлөнөн айанныыр олоҥхону толорооччу А.П.Бурцев-Бөскөй Бөҕө айанын суола көнө буоллун, аартыктара арыллан истиннэр.

error: МБУ \"Усть-Алданское управление культуры\"